THLARAU LAMA I CHHUNGTE NGAIHVEN RAWH

_Hmangaihna Thumal Ropui Pasarih_

By Rick Warren 

— March 25, 2025

“Putar deuhte hau suh la, pa angin thlem zawk rawh; rawlthar deuhte chu unau angin; pitar deuhte chu nu angin; nula deuhte chu thianghlim takin farnu angin.” 1 Timothea 5:1-2

Isua zuitu i nih chuan i chhungte chauh i ngaihsak a rem tawh lo. Thlarau lama i chhungte - Pathian chhungte pawh i ngaihven a ngai tawh ang. 

Isuan, “Tupawh ka Pa vana mi duhzawng ti apiang chu ka unaute, ka farnu te, ka nu te an ni asin," a ti a. (Matthaia 12:50). Chumi awmzia chu, Isua zuitu i nih chuan, nang leh kei hi kan inchhung tihna anih chu! Isua Krista kaltlanga Pathian khawngaihna lo lang chuan chhungkua angin min phuar nghet ta a ni.

Kristian hmasate hnena lehkhathawn ah chuan, “Putar deuhte hau suh la, pa angin thlem zawk rawh; rawlthar deuhte chu unau angin; pitar deuhte chu nu angin; nula deuhte chu thianghlim takin farnu angin.” (1 Timothea 5:1-2). Pathian chuan Krista taksa ah chuan i ringtupui dangte chu thlarau lama i chhungte chu i pa, i nu leh unaute anga en turin a beisei che a ni.

Bible-in Isua khan Josefa leh Mari fa dangte huam tel vekin, tisa lama chhungte a neih thu min hrilh a. Isuan thilmak a tih te pawh a unau ten an hmuh ve thu an chanchin Bible aṭangin kan hrethei a ni. Isua unau Jakoba khan Thuthlung Thar bu pakhat hi a ziak ve nghe nghe a ni.

Nimahsela, Isua kha a thihdawn khan a nu kha a unaute kutah a dah miah lo. A zirtir hmangaih Johana kutah a dah daih thung a ni. Engnge a chhan? Johana 7:5 ah chuan Isua unaute kha tumah ringtu an la nih loh thu kan hmu tlat a ni. Thawhlehna a thlen hma kha chuan Isua chu Pathian Fapa a ni tih an la ring lo a. A hnuah erawh chuan Jakoba chu Jerusalema kohhran hruaitu a ni ta tho a ni.

Isuan a nu kha Johana kutah a dahna chhan chu khatih lai khan Johana kha ringtu puitling tak a ni tawh a ni. Tisa lama a chhungte ai mah khan khawngaihna avanga inzawmna nghet zawk chu thlarau lama chhungte nihnain a nei a ni.

Pathian chuan rinnaa a chhungte chu i tan pawh a dah ve a ni. Tisa lama i chhungte ai mah khan thlarau lama i chhungte nen inkungkaihna nghet zawk in nei thei a ni. Chungte chuan thlarau lama chhungte an nih ang ngeiin ṭha takin an enkawl thei ngei ang che.

Galatia 6:10 ah chuan, “Chutichuan remchang hun kan neihzia ang zelin mi zawng zawng chungah thil tha i ti ang u, rinna chhungte zinga mi chungah i ti deuh ber ang u.”

Mamawhtu apiangte tan ṭanpui hna thawk fo ang che. Thlarau lama i chhungte hnenah phei chuan i rilru pe leh zual ang che.

Ngaihtuah zui atan

* I ringtupui dangte chu i chhungte anni tih i hriatchhuah hnuah chuan i enkawl dan leh i chetdanah engtinnge danglamna i neih ang?

* Thlarau lama i chhungte zingah enkawl emaw ṭanpui ngai an awm em? Vawiinah hian ngaihsak turin engtin nge ṭan i lak ang?

* Pathian chhungte ila ni lo anih chuan, tun dinhmunah hian engin nge dal che?

*[Lettu: Sangpuia]*