Police-in dan phal loh thil tam tak man

Aizawl | March 24, 2025: Dan phalloh thilte dona kawngah tha thlah lovin Police ten theihtawpin hma kan la zel a, a hnuaia tarlan ang hian Mizoram Police chuan ruihhlo leh dan kalh thilte tunhnaiah a man:

1). Nimin, date: 23.03.2025 khan Champhai Police, Chalbawiha Junction, Khankawn Police Check Gate-a duty te chuan Ashok Leyland truck (B/R No. MZ-01K-5785), Emmanuel-a (22) s/o Lalrinawma, Melbuk, Champhai District khalh chu rinhlelh thu ah lo check-in, thil phut var (white powder), Caffeine ni ngeia hriat barrel 40, pakhat rih zawng kg 25 vel zela rit an man. A vaiin an thil man hi Kg 3000 niin, Rs. 45,00,000/- man hu vel nia chhut a ni. Heng thil hi K. Lalthianghlima (31) s/o Khuanghnuna, Kanan Veng, Champhai leh Zonunsangi (30) d/o Vanramngaia (L), Bethel Veng, Champhai te ta niin, chhui zuina aṭangin heng Caffeine te hi Methamphetamine siamna atana hman tur ni ngeiin hriat a ni bawk. Champhai PS Case No. 43/25 Dt.23.03.2025, u/s 25A/29 ND&PS Act ziah luh a ni.

2). Date: 22.3.2025 khan Lunglei PS team chuan Lunglei District Special Branch leh 92 Bn. BSF (Advance Party) hnen aṭanga an thu dawn bawhzuiin, Silai mu (7.62mm) - 7200, Detonator - Bawm 6, Primary Cord/Cordex - Tel 12 leh Fuse Wire - Tel 2 chu F.Laltlanmawii w/o HC Zorampianga, Chanmari, Lunglei chenna in atangin an man.

Hemi kaihhnawihah hian mi pali, - (1). F.Laltlanmawii (40) w/o HC Zorampianga, Sairep, P/A Electric Veng, Lunglei, (2).Zonunpari (42) w/o Chanchinmawia, Sairep, P/A Electric Veng, Lunglei, (3). Zakaria Lalramdinpuia (38) s/o Rohmuna, New Siaha, Siaha Disttrict leh 4). Lalremtluanga(47) u/s 25(1AA) Arms Act r/w 5(a) Explosive Substances Act ziah luh a ni.

3). Date: 20.3.2025 zing khan Lunglei District Special Branch (DSB) leh 92 Bn BSF(Advance party), Lunglei joint operation team te chuan heroin, hawng 24, gram 259 a rit, cheng nuai riat man hu chu (1). Lalianmawia(36) s/o Roneiha, Saikhum Leilet, Falam district. Myanmar, (2).K.Lalchhanhima(63) s/o Rammawia, Durtlang, Aizawl, (3).Lalhriatluanga(28) s/o Vanthanga(L), Singai, Myanmar leh (4).Lalhmingliani (46) d/o Lalfamkima, Zotlang, Lunglei te kut atangin Salem Veng, Lungleiah an man. Lunglei PS Case No.43/25 Dt.20.3.25 u/s 21(c)/25/29 ND&PS Act r/w 14(b) Foreigners Act ziah luh a ni.

4). March 13, 2025 zan khan Zokhawthar PS team New Hruaikawn Road-a mobile patrolling te chuan Bike pathum leh Champhai Taxi pakhat, MZ04B 0344 New Hruaikawn aṭanga Champhai pan mek te chu tidingin thu an zawt a. Hetia thil an zawh lai hian Taxi leh Bike pathum te hi thawklehkhatah chak takin Champhai lam panin an tlanchhe ta mai a. Police te hian um nghalin Taxi, Chhuansawmlala (18) s/o Paumuanthanga, Khuangphah khalh leh a mi phurh Vanlalhriata (21) s/o Lalpekruala, Zokhawthar, Taitesena Section te chu nangchingin man (apprehended) nghal an ni. Bike pathuma chuang, puitling pali leh kum tling lo pakhat te pawh a hnuah man an ni bawk.

Thu zawhfiahna aṭangin heng mite hian inthurualin a huhovin dan kalhin ruihhlo an tawlh ngei tih an inpuang a. Satha ip hring leh thawmhnaw ip dum chhungah heng ruihhlo hi dahin Taxi-ah hian an hlang ngei a, mahse Police duty an hmuh hnuah kawng thlangah an thehthlak thu an sawi. An inpuanna bawhzui hian March 14, 2025, 6:30 AM khan anmahni hruaiin an ruihhlo paih thlak hi zawn a ni a, Police duty-na hmun atanga 1.5 Km velah Heroin hawng 440 (Kg 4.722 a rit), tualchhung rate-a ₹1,41,66,000/- man hu man a ni ta a ni.

He thila inhnamhnawih mi paruk – 1). Chhuansawmlala(18) S/o Paumuanthanga, Khuangphah, Champhai Dist, 2). Vanlalhriata(21) S/o Lalpekruala, Zokhawthar, Taitesena Section, 3). Zothansanga (20) S/o Lalpekliana, Zokhawthar, Taitesena Section, 4). Lallianmawia (19) S/o Lalhmangaihthanga, Zokhawthar Khuangchera Section, 5). Lalmalsawma (21) S/o Chhunglawma, Zokhawthar, Neuva Section leh 6). Zomuansanga (18) S/o Rohlira, Bethel Veng, Champhai te chu dan angin man nghal an ni a, kum tling lo pakhat erawh JJB Champhai hnena hlan turin hren chhunzawm a ni. Zokhawthar PS Case No.36/25 Dt.14.03.2025 u/s 21(c)/25/29 ND&PS Act ziah luh a ni bawk.

He thil hi uluk taka chhui chhunzawm niin he ruihhlo tawlhruka inhnamhnawih mi pahnih :- 1). Henry Lalbiakzinga (34) s/o R. Malsawma, Dinthar, Aizawl leh 2). Laltluangzela (28) s/o Lalrosanga, Zokhawthar te pawh Dt.15.3.2025 khan Aizawlah man an ni bawk.

He case hi uluk taka la chhui chhunzawm zel niin, he ruihhlo tawlh ruknaa inhnamhnawih dangte pawh chhui chhuaha man tumin ngawrh taka hma lak chhoh zel a ni.

Mizoram Police chuan thuchhuah sianin, Dan bawhchhiatna hrang hrang donaah thawhpui zel turin leh Police hnena thilsual titute thlen kawngah te tan la thar zel turin mipuite an sawm a ni.