Aizawl | March 28, 2025: Vawiin March 28, 2025 Zirtawpni hian Congress Bhavan-ah Mizoram Pradesh Congress chuan Political Session kan hmang a, he hunah hian MPCC Vice President Ronald Sapa Tlau chuan thu sawi in, 'Tunah hian ZPM sawrkar kan hrawn mek a, a key an la sang khawp mai. Kan CM ngei pawh hian, 'Kan tha bik dawn' a ti thin a, a video te pawh Youtube ah te hmuh tur a awm a ni. Mahse an insawi angin an awm thei lova, an sawi loh ang hlirin an awm avangin mipui pawh hian an ring tawh lo a ni. Thingtlanga kan zinnaah pawh an rin ngam tawh lo zia min hrilh thin a, an inchhir tan mek a ni.
"ZPM leh MNF hian inanna an neih chu hmui dawthei, hmui themthiam, a tak ram thleng lo an nei ve ve hi a ni. ZNP pa pakhat chuan, 'Kan pu hi a thusawi hi eng chen nge awih tur a, eng chen nge paih tur ka hrethiam lo.' a ti a ni. Sawhthing chungchangah pawh Assembly House rorelna ah ngei, 'A bo a bang awm lovin kan lei dawn.' a ti a, Session tawp lamah chuan, 'Kan lei zo thei lo anih pawn kan inhrethiam dawn nia' a ti leh daih si a ni. Keini erawh chuan President dawt sawi ngai lo leh rintlak kan nei a ni.
Tunlai hian ruihhlo an man nasa em em a, heng te hi dan lekkawh lama kan sawrkar hlawhchham vang a ni. ZPM hi Sawhthing chingtuten beiseina sang tak neiin an thlang tling a, mahse tunah chuan an beiseina hi a hniam tawh hle a, beidawnna ruamah an lut tan mek a ni. Hengte vang hian mipuite rilru ah ZPM hi a hniam tawh hle a ni.
ZPM an hniam mek laiin MNF hote pawh an hotute lakah an beidawng hle a, an hrisel bawk si a, hruaitu nih an tum reng bawk si a, an buai hle a ni. MNF te hian keini insiamfel hma hi min awt hle a ni. Chuvangin keini party hi mipui ten min en a, beiseina kan lakah an nghat tan mek a ni.
Hmani ah khan Minister pakhat chuan thlai thar lei an kalpui chhan chu kuthnathawktute taimak leh thawhrim an zirtir duh vang niin a sawi a, kuthnathawktute hi an taima in an thawkrim lovah a ngai anih hmel. Keini chuan kuthnathawktute hi an taima in an thawkrim kan ti a, anmahni chawikan nan NLUP pawh kan lo kalpui tawh thin a, a hlawhtlinna pawh zoram dingtluanah hmuh tur a awm a ni.
Mipuite hian party pathum an enchhin tawh a, Congress nge nge an ti tan mek a ni. Congress in hmasawnna hna kan thawh tawh leh thiltih tha te an ngaihtuah a, Congress nge nge an ti mek zel a ni. Chuvangin keini hi thawkrim ila, rinawmna nen ke kan pen chuan kan mipui ten min chawikang leh ngei ang. Kan puanin te zauh ila, mi tam zawk dawlzo turin inbuatsaih ila, hmalam i pan zel ang u." a ti.
Party Bulletin 'KUTPHAH MAWI' thla khata vawi hnih chhuak chu Pu Lal Thanzara, President, MPCC chuan a tlangzarhna hun a hmang bawk.
He Political Session hi Pu PC Laltlansanga, General Secretary chuan a kaihruai a ni.
• • • • • •
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: