PATHIAN CHUAN NGAIHDAM TLAK NIIN A HMU CHE

_Pathian Mit Atanga Thlirna_

- Rick Warren

- March 18, 2025

“Hmangaihnaa thianghlim leh sawiselbovin ama hmaah kan awm theihna turin leilung pian hmain Kristaah min thlang.” Ephesi 1:4 

_Ngaihdam_. He thumal hi kan ngaihthah fo thin. Kohhranah i inhmang emaw Kristian i nihnaah hian vawi tam i hre tawh a, mahse i ngaihtuah zuilo maithei a ni. Vawiinah erawh chuan ngaihdam tih awmzia leh ngaihdam tlak tih awmzia te kan ngaihtuah dawn a ni.

Ephesi 1:4 ah chuan, “Hmangaihnaa thianghlim leh sawiselbovin ama hmaah kan awm theihna turin leilung pian hmain Kristaah min thlang,” a ti. Pathianin a siam hma che khan, i tihsual leh i sualna zawng zawng pawh a hre fai vek a - a chhelai ber thlengin. Nimahsela Pathian chuan a thlang tho che a, hmangaih tur leh ngaidam tur chein - a mitah chuan sualna reng i nei lo a ni.

Chu chu khawngaihna chanchin tha a ni: Isua i pawm anih chuan, i sualnate thaibo a ni. Nimahsela rin chu kan harsat theuh si a ni. Engvangin? A chhan chu Pathian tihsualah kan puh thin a ni. Kan nunah harsatna a thlen chuan, “Engvang nge kei kher, Lalpa?” tiin kan zawt a. Tihian kan han zeldin leh a, “Pathian i tih thinur avangin!” Nimahsela chutiang chu Pathianin a chhan dan che a ni lo.

Isaia 43:25 ah chuan, “Kei, keimah ngei hi, keimah leh keimah avang ngawta in bawhchhiatnate thai bo thintu chu ka ni; in sualnate pawh ka hre reng lo vang.” Keimahni ang lo takin Pathian chuan kan sualnate a theihnghilh thin.

Rom 8:1 ah a nemnghet a, “Chutichuan tunah zawng Krista Isuaa awmte tan chuan thiam loh chantirna reng a awm tawh lo.” Pathianin i sualnate a hrereng lova. A thai bo zawk a ni.

I nun chu Krista hnenah i hlan tawh anih chuan, i nunah danglamna a thleng ang:

Mi tamtakin vanram kawtchhuaha innghak khawmin, vanram luh beiseiin an awm niin an hmu a. Nimahsela Isua i pawm chiah hian, engkim a inthlak danglam a. I nghah ve a ngai dawn lo. Vanram luh phalna i nei nghal dawn. Pathian chhungteah i tel tawh a, i sualnate chu a liam tawh a ni. 

Chuvangtak chuan Isua a lo kal a - rorelna nia chhandam tur leh Pathian chhungkuaa i dinhmun sawhnghet turin. Ngaihdamna chu i nghah a ngai lo; i kutah a awm tawh a ni.

Thawk han la te te la, “Lalpa ka lawm e, Isua avanga ngaihdam ka ni hi,” ti ang che.

Ngaihtuah zui atan

* Ngaihdam tlakah i inruat ve reng reng em? Engnge a chhan?

* Isua hnenah i nun i hlan chuan, ngaihdam i ni tawh. Krista avanga ngaihdamna chang i ni tih i inhriat chuan i nitin nun hman dan leh i tawngtai dan engtin nge a tihdanglam?

* Pathianin a ngaidam tawh che. Midang ngaidam ngai i nei em?

 *Krista Isuaa awmte tan chuan thiamloh chantirna reng a awm tawh lo*

 Bible chuan Johana 3:18 ah “Tupawh amah ring chu thiamlohvin a awm lo vang” a ti a. Rom 8:1 ah chuan, “Krista Isuaa awmte tan chuan thiamloh chantirna reng a awm tawh lo” a ti bawk.

Isua i pawm thei dawn a nih chuan, thiamlohchan hlau tawh lovin, amah hnenah i nun hlan la, hetiang hian tawngtai rawh le:

“Duhtak Isu, ka sualna avanga nang nena kan inthenhrana hi ka duh tawh lo. Nang ka rin che chuan ka thiltih sual zawng zawngte min ngaidam dawn a ni tih min tiam angin, nun awmzia hi zir ka tum ta, chuti chuan i vanram in nuamah engtikniah emaw chuan min la pawm ve ang. 

“Ka sualnate ka rawn puanga, ka chhandamtu i ni tih ka ring e. Ka sualnate ka puana nang ka rin che chuan ka him ang tih min tiama. Chhandamna chu khawngaihna avangin rinna kaltlanga kan neih a ni a thildang vang a nilo i tih avangin ka ring che a ni. Ka nunah hian Lal ni turin ka pawm ta che. Vawiinah hian i hnung zui ka duh a, ti tura min tih apiang chu ti turin ka inpeih e.

“Nung tura min siam ang ngeia nun ka duha. Hlimna dik chhar ka duha, mahnia tana nuna ai chuan damchhunga i rawngbawl ka duh a ni. Ka nunna i hnenah ka hlana, min chhanddam tur leh i angchhunga min pawm ve turin ka ngen a che. Isua hmingin ka dil e. Amen.”    

Isua pawm tura i tawngtai thei anih chuan, he email ah hian min lo hriattir la, min lo bia ang che Rick@PastorRick.com. Isua nena zinkawng i zawh tanna tura thil pawimawh a thlawnin ka pe dawn che nia.  

*[Lettu: Sangpuia]*