Aizawl | March 10, 2025: Lawngtlai West MLA C Ngunlianchunga chuan vawiin chawhnu khan Aizawl Press Club-ah thuthar thehdarhtute kawmin, anticipatory bail lak a tum loh thu a sawi.
CM Lalduhoma'n House-ah LADC CEM tura ruat V Zirsanga case chungchanga zawhna a chhannaah Congress MLA C Ngunlianchunga pawh case nei lai a nih thu a sawi chhuak a. Nguna hian, Case a neikh thu a hriat loh thu leh CM-in a sawi hnu-ah a hriat chauh thu a sawi.
C Ngunlianchunga chuan, "A case a kha a hrechiang hle ni pawhin a langa, prosecution sanction a kha pek mai kha a chak viuau a, ram tan a nih chuan kei pawh ka tang mai ang a, tan kha ka hreh lova, tin, anticipatory bail hi ka la lo bawk ang, He case-ah hian." a ti a.
"A tul a nih chuan ka tang anga, ram tan chuan tan mai ni lovin, a thih pawh kan thi mai ang chu - ram leh hnam tan chuan - chu chu kan din chhan leh ram hruaitu ka nih ve chhan pawh keimah-ah chuan a ni." a ti bawk.
C Ngunlianchunga chuan, case chu eiruk thubuai a nih thu sawiin, Lai Autonomous District Council (LADC)-ah Chief Executive Member (CEM) a nih laia Non Lapsable Central Pool of Resources (NLCPR) atanga Lawngtlai by pass kawng laihna tur sum tichingpen-ah inrawlh anga puhna a nih thu a sawi.
A hunlaiin 1st Installment nuai 470 vel lut hman mahse, Minister a nih dawn tak avangin LADC CEM a nihna kalsanin, V Zirsanga chu CEM a ni a, a hnuaiah hna kalpui a nih tawh thu leh he thubuaiah hian a inrawlh loh thu a sawi.
Post a Comment
He post chungchanga i ngaihdan lo sawi ve rawh: