PATHIAN HMANGAIHNA CHUAN PHUTLET A NEI LOVA CHATUAN ATAN A NI

_Hringnuna Damna Rahbi_

- Rick Warren

- February 19, 2025

“Hmangaih tawp lovin ka hmangaih chia, chuvangin lainatnain ka hruai haw che.” Jeremia 31:3

Pathian chu tunge a nih tih i hriatchianna leh a hmangaihna pawh chatuana hmangaihna a ni tih hriatna chuan beiseina a pe ang che. Chutihrual chuan tunge i nih tih pawh i inhriat a ngai ve tho - fel lo leh tling lo chung pawha Pathian hmangaih i ni.

Pathian chuan i nihna zawng zawng a hre vek; zep nei miah lova nung turin a beisei zawk che a ni.

Thudik chu hei hi, i kehchhe vek tih hi a ni. Kei pawh ka kehchhia a. Kan vaiin hian kan kehchhe vek a. Khawvel kehchhe mekah kan cheng a ni. Rom 3:23 ah chuan, “Mi zawng zawngin thil an tisual tawh vek a, Pathian ropuina an chang zo ta lo a ni.” 

Chhungrilah pawh kan nihna a ni tih kan inpawm vek. Tuman famkim kan inti lo. Nimahsela kan nihna kan zep a, kan kehchhiatna hi thup kan tum tlat anih chu.

Luka 12:2 ah min hrilh nawn a, “Lang lo tura thuhruk engmah a awm si lo; hriat loh tura zep pawh engmah a awm hek lo.” Thudik chu zawi zawiin a lang chhuak tho si a, engvangin nge lem kan chan reng? A tawpah chuan, lawng pakhatah kan chuang ho vek tih kan inhrechhuak a - lo kehchhe tawh, Pathian khawngaihna mamawh vek kan lo ni si a. 

Nimahsela chu chu thawnthu tawpna a ni lo. Lo kehchhe mah la, nangmah hrechiang bertuin a la hmangaih tlat che hi a ni. Pathian hmangaihna chu mihringte in hmangaihna ang hi a ni lo. Mihringte in hmangaihna chu a tlawlhin a chuai thin. Thenkhatte phei chuan an hmangaihna chu hlawhchhuah ngai khawp ang hialten an khawsa thin.

Nimahsela Pathian hmangaihna chuan phutlet a nei lova, a thlawna pek a ni. “Hmangaih tawp lovin ka hmangaih chia, chuvangin lainatnain ka hruai haw che.” (Jeremia 31:3). Engang mi pawh ni la, Pathian chuan a hmangaih tawp lovang che.

Bible chuan, “Chung ringtute chu, Krista Isuaa tlanna awm avang chuan, a khawngaihnain a thlawna thiam chantirin an awm a,” a ti. (Rom 3:24). Hei hi thilthlawnpek a ni, a hlawha hlawhchhuah chi a ni lo.

Pathianin a hmangaih sawtna tur leh a hmangaih loh sawtna tur atan hian engmah tihtheih i nei lo a ni. A hmangaih theihna tur zawng zawng - chatuan atan leh tawp nei lovin a hmangaih tawh che a ni.

He thilpek hi ila dawng lo anih chuan, tawngtaina mawltein tan ang che: “Lalpa, i ngaihdamna, inlaichinna leh nunna nangmah chauhin i pek theih chu ka duh e.” Chu chu beiseina tak tak innghahna a ni.

He thudik hi a hretawhte tanah pawh, i thil tawnte avangin hmangaih lovah i inngai maithei e. Thudik tawp ngai lo chu hei zawk hi a ni: Pathianin a hmangaih che tih hi.

Nangmah i inngaituah chian phei chuan achang chuan chan chhe ber leh hmasawnna tur nei tawhlo hialah i inngai maithei e. Inhnialna, harsatna leh buaina leh lusunna thlengin tawk mah la. He thihna leh lusunna atang pawh hian hlimna tak tak i nei thei a ni.

Matthaia 5:4 ah chuan hei hi min tiam a, “Lungngaite chu an eng a thawl e, thlamuanin an la awm dawn si a.”

Beiseina tak tak chu mahni inhmuhchianna atangin a ni - kehchhe tawh Pathian hmangaihn ni si. Eng harsatna pawhin chim buai che mahsela nitin chu thudik ah chuan awm tlat ang che.

Ngaihtuah zui atan.

* Engvangin nge beiseinaa nun tikhat turin Pathianin chatuanin min hmangaih a ni tih hi hriatchhian a tul?

* Eng hian nge an nihna diktak kehchhia an ni tih hi an sawi ngam thin loh, chu chuan Pathian nena an inkarah engnge nghawng a neih?  

* Pathian hmangaihna phutlet neilo leh mihring hmangaihna phutlet nei hriatthiamna hian i nun engtin nge a nghawng i rin?

*Pathian ngaihdamna i chang tawh em?*

Pathianin a ngaidam che, i that vang ni lo vin, a that em vangin a ngaidam che a ni. Mi tha famkim nih tum kher pawh a tul lo. I tha famkim thei dawn si lo va! Chu chu Pathian khawngaihna mak tak chu a  ni zawk.

Pathian hnenah ngaihdam i dil anih chuan, rang tak leh famkim takin a ngaidam che. Chu chu thil ropui tak a ni. Engpawh lo tisual la, i sualna avang khan Pathianin a hnawl lo che. Rilru inhawng takin hmangaihna ban nen a lo lawm zawk che a ni.

"Lalpa, thil ka lo tihsual tawh zawng zawng min ngaihdam avangin ka lawm e. Ka duhnaah ka kal a, mahse tunah chuan i khawngaihnaah ka rinna ka nghat e. Ka sualte min ngaidam turin ka ngen a che.

Vawiin hian Isua Krista ka tana a inpekna zara chatuan nunna a thlawna min pek chu ka pawm e. Vanram hi ka hlawk chhuak thei hauh lo tih ka hria. He Thlarau thil thlawn pek hi ka pawm e. Ka nunah lo cheng la, i hmangaihna, hlimna, muanna leh dawhtheihnain min vur ang che.

Lalpa, ka nuna thil bîk, thlarau lama theihna min pek hi ka pawm e. Hmu chhuak a, i tana hmang a, puntir a, min siam anga nung turin min pui ang che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

*[Lettu: Sangpuia]*