Mizoram State Snooker championship 2024 - 2025 zo fel, Lalrina Renthlei a champion

Aizawl | Feb 24, 2025: Mizoram Snooker & Billiards Association (MSBA) buatsaih Mizoram State Snooker championship 2024 - 2025 chu inrinni tlai khan zawh fel a ni a, Lalrina Renthlei a Champion.

Mizoram State Snooker Championship 2024 - 2025 final hi Feb 22, inirnni tlai dar 3 khan khelh tan a ni a, final-ah hian Lalsangzela, Khatla South leh Lalrina Renthlei, Tuikhuahtlang te an inhmachhawn a, Lalrina hian 4 - 2 (frame 4 - frame 2) a hnehna changin a Champion a ni.

Mizoram State Snooker Championship 2024 - 25 hi Best of 7 (frame li la hmasa sa chak) a khelh a ni a. Mizoram Snooker & Billiards Association (MSBA) Snooker Ranking-a No. 1 leh No. 2 inhmachhawn an ni bawk a, an game a hmuhnawm hle.

Lalrina hian Semi Final-ah PB Liansangzuala, Dawrpui Veng a hneh a, Zela hian Zonuntluanga, Electric Veng hnehin final a inhlangkai a ni.

Mizoram State Snooker Championship 2024 - 25 ah hian Mizoram chhung aṭangin player 42 an tel a, Feb ni 17 (Thawhṭanni) aṭang khan MSBA Hall, Hawla Indoor Stadium, Republic Vengthlang-ah khelh ṭan niin, zanin khan a hmawr an bawk ta a ni.

January thla tawp lama 91st Indian National Billiards & Snooker Championship, 2025, Indore, Madhya Pradesh a khelh zawh takah khan Lalrina Renthlei leh Lalsangzela te hi Mizoram aiawhin an khel a, Lalrina (Top 16) leh Lalsangzela (Top 32) te hian an khel ṭha hle a, Senior level ah chuan National Championship a Mizoram in record an neih ṭhat ber ṭum a ni nghe nghe.