Minister Lalnghinglova Hmar-in Mizoram lam hawi turin Chennai investor summit-a kalte sawm

New Delhi | February 6, 2025: Ministry of Development of North Eastern Region (DoNER) buatsaih, North East Investors Summit-a thusawitu Pu Lalnghinglova Hmar, Minister of State, LESDE/Sports & Youth Services Department, Mizoram chuan Mizoram chu investor-te tana hmun țha, hmasawnna hnathawhna tura kawng hawng zautu a nih avangin Mizoram tlawh tur leh Mizoram lam hawi turin investor summit-a kalte a sawm.

February 5 tlai khan Chennai-ah DoNER Ministry buatsaihin investor-te inhmuhkhawmna hun hi neih a ni a, DoNER Minister Pu Jyotiraditya Scindia leh Mizoram Sports Minister Pu Lalnghinglova Hmar-te'n thu an sawi.

Sports Minister Pu Lalnghinglova Hmar chuan Mizoramin tun hnaiah thlai a thar țhahnem dawn a, a bikin sorkarin lei a intiam tawhna - sawhthing, hmarcha, aieng leh hmunphiahte lei tur a awm dawn tiin a hlawma lei duhte tan Mizoram sorkarin kawng a hawng zau zel dawn tih a sawi a, Mizoram sorkar chuan kuthnathawktute bana a kaih thu a sawi lang.

Mizorama sawhthing chi hnih - Thingpui leh Thinglaidum bakah Mizo Hmarcha chuan GI tag an neih tawh thu leh, hmun danga hralh chhuah tlak an nih thu a sawi a; a hralhna kawnga thawhho bakah a sawngbawlna tur din tura thawhpuiah investor liante chu a sawm bawk.

Pu Lalnghinglova Hmar chuan, Mizoramah mau a țha duh em em tih sawiin tun aia țangkai zawka sawngbawl tura thawhho puiah industry neitute a sawm bawk a; DoNER Minister pawhin India hmar chhak chu mau tamna leh țhat duhna a nih angin a hmun ngeia kal chilh a, zir chiang a, hmang țangkai turin industry neitu kal khawmte a chah ve bawk.

Mizoram Sports Minister chuan sawi chhunzawmin, India hmar chhak chu sports lama theihna nei sang tak a nih thu leh, India-in kum 2036 Olympics thlen a tumna kawngah hmar chhak state-ten tha an thawh theih dan chu tun ațanga infiammite inbuatsaih țan a nih thu a sawi a, chumi kawngah chuan DoNER bakah private investor-te thawhpuiah a sawm bawk a ni.

LESDE Minister ni bawk Pu Lalnghinglova Hmar chuan Mizo țhalaite state pawna hnathawka an chhuah nasat thu leh, a bikin hospitality service lamah hnuhma an neih țhat thu kal khawmte a hrilh a, hei hi lian thama kalpui turin investor țha mamawh a nih thu a sawi lang.

DoNER Minister chuan hmar chhak state hmasawnna tura sorkar laipuiin ruahmanna a neihte leh duhsakna a pek dante a sawi a, Tamil Nadu state-a investor-te chu a taka hmar chhak state tlawh a, a theihna sang tak hai chhuah kawnga pui turin a sawm bawk a ni.

North East Investors Summit-ah hian hmar chhak state hrang hrang aiawhten an theihnate pho langin an state-a investment kalpui turin investor-te an sawm a; Mizoram sorkar aiawhin Pi Ramdinliani, Special Secretary, Agriculture & Horticulture Department chuan presentation a pe a, Pi Maria CT Zuali, Director, Commerce and Industries Department bakah official dangte an tel. He hunah DoNER ministry hotute leh Federation of Indian Chambers of Commerce & Industry aiawhten thu an sawi bawk a ni.