Chemtea vih vangin boral

Aizawl | Feb 2, 2025: Chemtea vihna hliam tuar lovin Armed Veng South tlangval a boral.

C Lalramthanga (35) s/o Hrangkhuma (L) Armed Veng South, Aizawl chu chemtea vihna tuar lovin zanin dar 8:50 vel khan ZMC&H ah a boral.

A ruang hi Armed Veng South-ah lak niin, naktuk chawhnu dar 12:00 ah vuiliam a ni ang. Ani hi Presbyterian Kohhran a lawi a ni.




January ni 28 zan dar 10:30 leh 11 inkar vel khan Armed veng S-ah insual buaina thlengin tlangval Thangtea chu na taka vih a ni a, a ril hmun 8-ah pawpin a pumpui a pawp bawk. ICU ah ventilator nen enkawl niin zanin dar 8:50 khan Thangtea hi a hliam tuar lovin a boral.


Vih a tawh dan chu:
Thangtea hi a u te pahnih tlangval ve ve te nen in khatah an cheng ho a, January ni 28 zan khan hmeichhe pakhat (Mission veng lam mi nia insawi) chuan Thangtea hi an inah a kal chilh a, zan dar 8 vel atangin Thangtea nen hian inkawmin an awmdun a. Zan dar 10 velah an inhnial buai tan ta a. Hmeichhia hian a bialpa nia a sawi Lalrinnunga (27) Mission veng mi tho chu phone-in a ko ta a. Rinnunga hi zan dar 10:30 bawr velah rawn thlengin an insual buai ta a ni. Thangtea u Mawitea muhil rawn harhin Lalrinnunga nen chuan chuan an insual buai leh ta a. Tharumah chuan Mawitea chuan a hneh a, che thei lovin hnung lam atangin a kuah bet a. Mahse Rinnunga hian chemte a lo pai si a, Mawitea mal leh a ban leh kutah te a vit ta mawlh mawlh mai niin an sawi. Mawitea hliam tawrhna hi a nunna atana hlauhawm a awm lo hlauh. An insualna lamah hian tile bang pawh an delh keh nual.

An thawmah thenawm te an rawn tlan khawm a, Rinnunga chu an man bet a, kut pawh an thlak nual a. Chutia an buai luai luai lai chuan Thangtea chu a khumah a mu reng a, a rum a rum a, an han en chiang a, a nakah thuk taka vihna a awm tih an hmu ta a. Damdawi in lamah rang takin an unau chuan tlan pui an ni a, Thangtea hi ZMC lamah refer niin that lam a pan thei lova, zanin dar 9 vel khan a chatthla ta a ni.

An in tihbuai zan khan Lalrinnunga hi police kutah hlan nghal niin, thu zawhfiah a ni a. A vihna hi chemte ni lovin tile keh them a nih thu a sawi tlat a. Hliam hmuamhma enin chemtea vihna ngei niin a lang si. Lalrinnunga hian a vihna chemte hi a paih a nih an ring a, in leh a chhehvel an zawnga an hmuzo si lo. Police ten Lalrinnunga thiante an kawmna atangin Rinnunga hian mahni inven nan chemte a pai reng thin niin an sawi. 

Thangtea ruang hi ZMC atangin an chenna in lamah lak phei tura buaipui mek a ni.

- Vanneihthanga








• • • • • • 
Share it with your friends!

[Subscribe telegram channel for updates- https://t.me/exploremizoramchannel ]

(Feedback at: admin@exploremizoram.com )

[For Ads - Contact +919402125273 ]



Post a Comment

He post chungchanga i ngaihdan lo sawi ve rawh:

Previous Post Next Post