Aizawl | Jan 29, 2025: ZORO General Headquarters buatsaihin Vawiin 29th January 2025 (Nilaini) chhun dar 12:00 khan Free Movement Regime (FMR) hlih leh Border fencing tum duhloh lantirna Aizawl-ah neih a ni a. He hun hi Pu Michael Lalramsanga President ZORO Thalai Hqrs in kaihruaiin, Pi Lalhmingliani chuan hunserh a hmang a ni. He hunah hian FMR hlip a, kengkawh tura India sorkar thupek leh Mizoram sorkar thupek hal a ni.
He huna thusawitu Pu Rohmingthanga Kawlni ZORO Vice President chuan, “Central sorkarin zalen taka kan unaute nena kan inkalpawh theih dan hlip a, a hlihna order a siam a, Christmas present niawm taka a rawn thawn hi keini ZORO chuan a lungchhiat thlak kan ti a, chumi rual a Mizoram sorkarin hmanhmawh taka hman theih tura a buaipui rum rum hi ZORO chuan kan hrethiam lova kan lungawi lo hle a ni.” a ti.
He huna thusawitu dang Pu L. Ramdinliana Renthlei ZORO General Secretary chuan, “Free Movement Regime (FMR) thiah leh Border fencing a lo rik tirh khan Zofate chuan kan helh hle a. ZORO pawhin kan theihtawp in kan dodal a ni. NGO hrang hrang leh Political party pawhin an dodal a, Mizoram State Legislative Assembly session-ah pawh duhlohna resolution lungrual taka pass a ni. A lan danah chuan Zofa zawng zawngin kan duh lo vek a ni. Heti khawp a Zofaten kan duh lo chunga India sorkarin a ti lui a nih chuan kan ramah eng harsatna pawh thleng se mawh kan phur dawn lo a ni. FMR hlih leh border fencing hi ZORO chuan a dodal zel dawn a, na zawk a hmala turin ruahmanna siam a ni dawn a, ZORO hmalakna thlawp zel turin mipui zawng zawng kan sawm a ni.”a ti.
Thusawitu dang Tv. Lalnunfela Chawngthu General Secretary chuan, “Zofa tlang hran hrana awm te zalen takin mahni chenna theuhah kan awm thei. Nimahsela British sorkarin min luhchhuah tak atang hian kan buai zo ta a ni. vawiinah hetiang hun hman a lo ngai ta hi a lungchhiat thlak ka ti hle a. FRM hlip a, border fencing hi kan dikna chanvo rahbehna leh chhuhsakna a ni a, kan dodal zel tur a ni.”a ti.
Vawiin ZORO in Free Movement Regime hlih leh border fencing duhloh lantirnaah hian MPCC aiawhin Pu Joseph Lalhimpuia, GS, MNF aiawhin Pu TJ. Lalnuntluanga, Ex-Minister leh ZPM aiawhin Pu Ngursailova Sailo, PAC in thu an sawi a ni. Free Movement Regime (FMR) hlih leh Border fencing tum duhloh lantirna hi Champhai, Serchhip, Lunglei, Kolasib, Mimbung, Vaphai leh Tengnopal Manipur-ah te hman a ni bawk a ni.
• • • • • •
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: