‘ruling vc leh opposition vc ten chanvo inang an chang tawh, ruling vc aiin khaw chhunga ruling worker te hnathawh uluk taka lo vil thei tur opposition vc tha kan mamawh zawk' - MPCC Spokesperson Dr Lallianchhunga

Aizawl| Jan 30, 2025:  MPCC chuan vawiin khan thuthar thehdarhtute kawmin,

MPCC Spokesperson Dr Lallianchhunga chuan, "‘ruling vc leh opposition vc ten chanvo inang an chang tawh, ruling vc aiin khaw chhunga ruling worker te hnathawh uluk taka lo vil thei tur opposition vc tha kan mamawh zawk' a ti.


Kan hma lawk, Feb. 12, 2025 a VC 544 leh LC 111 (AMC LC 87 & LMC LC 24) inthlan turah hian kan party mipuiten theihtawp kan chhuah zarah Congress party chuan hma a sawn em em a. Khua leh Veng hrang hrang atangin Congress party-ah HAW RUNPUI a thleng mek a, VC/LC inthlan tur denchhen hian MNF leh ZPM atangin mi engemaw zat kan lawmlut der tawh a, tunkar Zirtawpni hian Bhavan-ah lawmluhna hun kan hmang leh dawn a ni. Heng thil thleng te ngaihtuah hian Opposition Term 2-na hmang mek Congress party-ah mipuiten beiseina an nei thar hle tihna  a ni a, kan lawm hle a ni.

Sorkar Laipui Finance Commission in Tualchhung Sorkar te chanvo a bithliah fel vek tawh avangin Opposition VC leh LC te tan hmasawnna hna (development works) tam tak a thawh theih tawh a. Ruling VC nih vanga fachuam hamthatna dawng bik tura inngaih tur a ni tawh lo,  VC ni turin Ruling kher nih a ngai tawh lo a, ruling VC leh Opposition VC ten chanvo inang an chang tawh. He thu hi ZPM hotute ngei pawhin Opposition an nih laia tui taka an lo sawi tawh thin tho kha a ni.

March 8,2020 a Sesawng a ZPM buatsaih vantlang inkhawma thu a sawi tumin Pu Lalduhoma chuan, “Khaw tin chan tur budget siam sa vek a ni tawh. Ruling neih kher a tul tawh lo, ruling leh opposition VC te chan tur a inang reng tawh a ni” a ti a. (Source: Vanglaini, March 12, 2020)

August 8, 2020 khan ZPM President, Pu Lalliansawta chuan sorkarin LC leh VC inthlan a buatsaih rum rum chungchangah Press Conference a ko va, “state sorkar zen pui theih loh turin khawtin chan tur pawh then fel vek a ni tawh.State sorkar pawhin State Own Tax Revenue (SOTR) atangin 15% chu VC te chan turin a dah ngei tur a ni bawk…chuvangin, ruling VC nih vangin hamthat fal bikna tur a awm tawh lo a ni” a ti bawk. (ZALEN Aug 9, 2020)

ZPM sorkar hnuaia Mizoram hmasawnna atana kan mamawh chu Opposition VC a ni. ZPM Ruling Worker te’n khawchhunga leh veng chhunga hna an thawh te hneh taka lo vil thei tur Opposition VC tha kan mamawh a, chu chu Congress party hian Zoram mipuite kan tiam che u a ni. Ruling VC leh Ruling Worker te inkarah ‘in endik (check) tawn theihna’ a awm that a beisei awmloh avangin hmasawnna tha leh tlo duh khua tan chuan Opposition VC thlan mai a tha ber ang. Chuvangin, khaw tinah hmasawnna tha leh tlo a awm theihna turin Congress party VC Candidate zawng zawng thahnemngai taka min lo Vote pui turin Mizoram mipuite kan ngen che u a ni.





.



• • • • • • 
Share it with your friends!

[Subscribe telegram channel for updates- https://t.me/exploremizoramchannel ]

(Feedback at: admin@exploremizoram.com )

[For Ads - Contact +919402125273 ]


Post a Comment

He post chungchanga i ngaihdan lo sawi ve rawh:

Previous Post Next Post