MMA National championship-ah Mizote che ṭha; MMA Asian Games-ah lut dawn

Aizawl | Jan 13, 2025: MMA National championship-ah Mizote playerte an che ṭha a, MMA Asian Games-ah an lut dawn.

January 8 – 12, 2025 chhunga Dhar, Madhya Pradesh-a MMA (Mixed Martial Arts) national amateur MMA tournament neih zawh takah Mizoram aiawhin Mizoram State MMA Association (MISMA) chuan fighter pathum a tir a, medal pahnih an rawn hawn a, hetiang hi result a ni:

1) Lalnunsanga, Chawnpui, Featherweight - Gold medal.

2) Benjamin R. Lalremmawia, Ramthar N/ Ngopa, Flyweight – Bronze medal.

3) Lalramsangliana, Bawngkawn South, Bantamweight – Quarter finalist.

Lalnunsanga hi nikum National Open-ah gold medallist a lo ni tawh a, tun kum pawh hi a che ṭha leh hle. Champion lai a nih avangin round of 16 a bye a, ṭuarter final-ah champion hlui tho Tamil Nadu ami chu submission (Rear Naked Choke)-in a hneh a, Semi-Final-ah Assam fighter chu Technical Knockout-in a hneh leh a, Final-ah a thlengtu ram Madhya Pradesh fighter chu submission (Armbar)-in a hneh leh a ni.

MISMA President Rinpuia chuan MMA hi a lar chho mek a, kumtir a nih avangin fighter an inthawn tam theih loh thu a sawi a, chutih rualin kuminah pawh State level championship vawi hnih bakah fight night lian tak (MFL)-te huaihawt an tum leh thu a sawi. MISMA Technical Chairman Samuel Lalrozama chuan MMA hi professional line kal theihna kawng ṭha tak mai an zawm mek MMA India National Federation chuan a duan thu a sawi a, BRAVE FC leh UFC nen inkungkaihna ṭha tak an neih bakah , kumin aṭangin MMA hi Asian Youth Games leh Asian Indoor & Martial Arts Games-ah telh a nih tawh tur thu Olympic Council of Asia-in a puang tih a sawi bawk.