Mamit-ah MOC - Rahbi Combined Coaching Centre hawng

Mamit | January 13, 2025: Vawiin khan Govt. Mamit College Seminar Hall-ah Mamit Officers' Club (MOC), MZP, Mamit leh MYC, Mizoram tangkawpin an buatsaih MOC-Rahbi Combined Coaching Centre chu Pu K. Laltlawmlova, Patron, MOC leh District Bawrhsap ni bawk chuan a hawng.

Pu K. Laltlawmlova, District Bawrhsap chuan zirlaite fuihna thu sawiin mahni tuma chiang tur leh miin an tih vang ngawta ti ve kan nih chuan hlawhtlin a har thu a sawi a. Mi hlawhtling kan tihte hian an hlawhtlinna hi vawi leh khata an thawhchhuah a ni lova, tawrhchhelna beidawng lova beih talh talhna hi hlawhtlinna kawnga bet tlat a ni tih hre thar turte, pawnlamah a zawng a za a inhmang lo tur leh taima taka an zirlaite zir turin kalkhawmte a chah a ni.

Pi Jenny Thanhlupuii, TO Mamit chuan Course kalpui dan tlangpui a tarlang a, zirlai leh hna zawng lai te'n hna an zawnna tura tul tur hrang hrang inbuatsaihna tura Coaching kalpui a nih dawn thu a sawi a. Pu Lalkroshlua, Vice President, MZP Hqrs. pawhin mahni khawtual ngeia Coaching class hawnna tana MOC te inpekna chu fakawm leh chhuanawm a tih thu sawiin lawmthu a sawi.

He hun hi Dr. Lalrinfela H, Preident MOC chuan a kaihruai a, Dr. MS Dawngliana, Principal Mamit College pawhin fuihna thu sawiin, Pu C Lalrinmuana, Treasurer MOC-in lawmthu sawina a nei bawk a ni.

MOC-Rahbi Combined Coaching Centre-ah hian zirlai mi 27 an inziak lut a, Group B exam hmachhawn turin course hi thla thum chhung kalpui a ni dawn a ni.