DAWHTHEIHNA LEH TEIREI PEIHNAIN HLAWHTLINNA A THLEN

_I Tawpna Tur Hmuchhuak Rawh_

- Rick Warren

- January 29, 2025

“Inlarna hi hun ruat chhung atan mai a ni nghe nghe si a, a kin ni chu a hnai tial tial a, a thlawn lo vang. Rei deuh mahse, nghak rawh; a lo thlen ngei dawn avangin a tlai chuang lo vang.” Habakuka 2:3

I nunah ruahman lawk i neih loh chuan i thle kual mai mai ang. Genesis 24 kan zir mek a, Eleazaran ke pen dan min zirtir a ni.

A pawimawhnate chu kan zir tawh hlawm a:

* Mahni nuna insawrbing

* I duh chu chiang taka sawi 

* Pathian thutiam zawn

* Pathian tanpuina dil

* Mutan hriatchhuah

* Pen khat te te a ruahmanna siam

* Vawiinah chuan: Dawhtheihna leh teirei peihna kan zir ang.

Thil tum lian tak te hi zankhat thil thu-ah a thleng ngawt thei lo. I tum chu a len poh leh hun a duh rei ang. I thil tum chu a hlut poh leh hun leh tha pawh a hek ang. Tum hlen chhuak tur chuan hun  a duh a, inthunun a ngai bawk.  

Thil tum hlenchhuak turin dawhtheihna, teirei peihna, tumna leh chhelna neih a ngai. Ruahmanna lian tak siam la chumi bawhzui tur chuan i nun tam zawk hmang ang che.

Eleazara chuan chutiang chuan a ti a ni. Genesis 24:21 ah chuan, “Chhiahhlawh chuan ani chu a en reng a; Lalpan a va zinna chu a hlawhtlintir leh tir loh hriat nan a ngawi reng mai a.” Genesis 24:33 ah chuan, “Abrahama chhiahhlawh hmaah chuan ei tur an hlui a: nimahsela ani chuan, ‘Ka rawn kal chhan thu ka sawi hma loh chuan ka ei lo vang’ a ti a. Tin, ani chuan, 'sawi ta che,' a ti a. 

Dawhtheihna leh teirei peihna entirna tha tak a ni.

Hetiangin: I tum ram thleng turin nawmsakna chu i ti khawtlai phawt tur a ni.

Mi hlawhtling leh mi hlawhtling lo danglamna chu, mi hlawhtlingte chuan mi hlawhtling lote tih peih lohte an ti peih hi a ni. 

Mi hlawhtlingte chuan an tih chak lem lohte pawh an ti thin. Mi hlawhtlingte chuan nawmsakna tih khawtlai dan an zir thiam hmasa a. Tih tur dik tak leh harsa zawk te an thawk hmasa a, chumi hnuah a hlimawm lam an khawih chauh a ni.

 

Bible chuan, “Inlarna hi hun ruat chhung atan mai a ni nghe nghe si a, a kin ni chu a hnai tial tial a, a thlawn lo vang. Rei deuh mahse, nghak rawh; a lo thlen ngei dawn avangin a tlai chuang lo vang.” Habakuka 2:3

Pathian chuan a lo thleng lo vang a ti lo va - hun a duh deuh dawn a ti mai a ni. Puitlin kan zirnaah hian ‘aih’ tih leh ‘tunah ni lo’ tih hi thliar thiam a pawimawh a ni. 

Pathian chuan i thiltih ai chuan i nihna a ngai pawimawh zawk a. I hna ai chuan i nungchang a ngai pawimawh zawk bawk a ni. A chhan chu i hna kha vanramah i luhpui thei dawn lo a, i nungchang erawh i luhpui dawn a ni. Chuvangin i tum hlenchhuak tura i beihnaah hian Pathianin nangmahah hna a thawk mek a ni.

Ngaihtuah zui atan.

* Thil tum lian tak i puitlin kha ngaihtuah teh. Engtia rei nge hun i sen kha?

* I tum i hlenna kawngah Pathianin engtiangin nge nangmahah hna a thawh?  

* Vawiinah thil tum lian tak i nei a, thil hlimawm lam i tih hmain eng thil harsa nge tih hmasak ngai ngaihtuah rawh?

*Pathianin a chhungte ni turin a duh che*

Kan vai hian kan sual vek a – mahse Pathian chuan a hmangaihna leh ngaihdamna a lantir a. Bible chuan vanram chu Pathian rinna Fapa, Isua Krista kaltlanga in neih chauhin in lut thei ang a ti a. Vanram chu nangmaha i hlawhchhuah mai theih a ni lo. 

I sualna te i puang duh a niha, i nunah Isua i thlang duh a nih chuan, heti hian tawngtai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtikniah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawh tanna atana pawimawh te a thlawnin ka lo thawn ang che.

*[Lettu: Sangpuia]*