Zirtirtu hlawh rei tak an batsak hi pe vat rawh se - MNF

Aizawl | December 2, 2024: Mizo National Front (MNF) Media & Publicity Department chuan vawiin khan thuchhuah siamin, "Zirtirtu hlawh rei tak am batsak hi pe vat rawh se," an ti a.

"Opposition an nih laia inti hria leh sawrkar lai na tak taka sel thintu, vawiina a tithei dinhmuna dingtate hian an mawhphurhna hi a rang thei ang bera hlen thuai turin MNF chuan kan phut," an ti.

MNF chuan, "Mizoram Sawrkara Samagra Shiksha hnuaia thawk mek, zirtirtu leh thawktu dang tam tak, mi 3487-in Thlathum dawn hlawh la thei lova, an hlawh tur Central atanga thleng vek tawh hrenbeh sak an ni hi a pawi kan tiin, a rang thei ang bera pechhuak thuai turin Mizoram Sawrkar kan phut a ni." an ti a.

"Hun kal tawha kal dan thlirin, Samagra Siksha hnuaia thawktute tana sum lokal hi May 2024 vela 2nd Installment lo thleng tawh tura beisei a nih laiin, ni 8, November 2024-ah Central atangin alo thleng chauh a, alo thlen tlai tawh teh lul nen, ziaka ni 15 bak Mizoram Sawrkar chu kawl tang lo tura tih a nih laiin, 23, November 2024-a ni 15 a ral hnu vawiin thlengin pek chhuah ala nilo cheu a. Hei hian sum enkawl kawngah leh zirna ngaihpawimawh kawnga ZPM kaihhruai sawrkar hlawhchham zia chiang takin a tarlang a ni." an ti.

MNF chuan, "Hetiang taka zirna ngaihthah leh thawktute hlamchhiah Sawrkar kan nei hi vanduaithlak kan tiin, an tha leh thiamna chhawr duh reng chunga an hlawh hren sak rengtu, Mizoram Sawrkar hnuaia sum enkawltu Finance Minister hian a hna a tlin thlawtlo ni ah kan ngai a. Heng thawktute enkawltu School Education Minister pawh hian a enkawl Department thawktute pawimawhna hi a hre tawk lo nge, a ngaihna a hre thlawtlo tih hi mipuite zawhna a ni." tiin thuchhuah chuan an tarlang a.

"Opposition an nih laia inti hria leh sawrkar lai na tak taka sel thintu, vawiina a tithei dinhmuna dingtate hian an mawhphurhna hi a rang thei ang bera hlen thuai turin MNF chuan kan phut a. An thawh hlawh liau liau a hun taka pe thin tur leh hunpui lo thleng tur hi an hlawh hmanga an chawm, an chhungkuate nen thlamuanga an hman ngei theih nan Mizoram Sawrkar chu a tih tur ti nghal turin MNF chuan a phut tlat a ni." tiin thuchhuah siamin an tarlang.