TAKSAA PATHIAN CHAWIMAWI DAN

_I Nun Kal zel Atana Pathian Hmathlir_

By Rick Warren 

— Dec 3, 2024

“A nih leh, in taksa chu, in chhunga awm Pathian hnen atanga in hmuh Thlarau Thianghlim in a ni tih in hre lo em ni le? Mahni ta pawh in ni lo va, Mana lei in ni tawh asin, chuvangin in taksaah chuan Pathian chawimawi rawh u.” 1 Korinth 6:19-20

Tihthianghlimna chungchang hi biak inah emaw lehkhabuah emaw a awmzia dik tak hre lo vin i lo hre tawh maithei e. Hetia han ngaih mai chuan thil tih harsa tak angin a lang maithei e. Thil awlsam tak a ni: A awmzia chu Pathian tana thil engemaw kan hlan hi a ni mai.  

Thil tihthianghlim theih i nei nual — i car te, i chenna in leh i hna te pawh—hetianga sawi chung hian, “Lalpa, he thil hi i tan kan hlan e. I tan hmang ang che.” Nimahsela Pathianin a bik taka hlan tura min dil thil pakhat a awm — kan taksa hi a ni. Bible chuan, “A nih leh, in taksa chu, in chhunga awm Pathian hnen aṭanga in hmuh Thlarau Thianghlim in a ni tih in hre lo em ni le? Mahni ta pawh in ni lo va, Mana lei in ni tawh asin, chuvangin in taksaah chuan Pathian chawimawi rawh u.” (1 Korinth 6:19-20).

Engtin nge i taksa hmang chuan Pathian i chawimawi tak ang? Awlsam tak a ni: I taksa enkawl ṭha la a ni mai. I taksa i enkawl ṭhat chuan, i lo hrisel lehzual ang a, chakna i neih belh ang a, tichuan Pathianin ṭangkai lehzualin a hmang thei ang che.

Hei hi taksa hriselna tur ringawt a ni lo—inbuktawkna a ni zawk. Pathianin awmze nei takin a duang che a, mut hahchawlh hun te, chaw ṭha ei te leh taksa insawizawi tur tein. I hriselna a ngaipawimawh hle a ni. Sam 119:73 chuan, “I kutin mi siamin, mi din a ni: I thupêkte chu ka zir theih nân hriatthiamna mi pe ang che.”

Mut tam i mamawh maithei e. Zana rei tak TV ena hun khawhral chu a tuk atan a hrehawm duh khawp mai. Sam 127:2 ah chuan, “Zing takah in tho va, tlai takah in chawl a, thawhrimna chaw in ei ṭhin hi, in tan a thlawn mai a ni: Hetiang hian a mi duh tak chu a muthilhtir ṭhin a ni.” A chang chuan i mamawh ber chu mut hahchawlh hi a ni.

A changa i mamawh chu ei-in insum hi a ni. 1 Korinth 6:13 ah chuan, “Ei turte chu pum tan a ni a, pum chu ei turte tan a ni; nimahsela Pathianin a tiboral ve ve dawn. Tin, taksa hi inngaih nan a ni lo va, Lalpa tan a ni zawk e; Lalpa pawh chu taksa tan a ni.” Taksa tana mamawh tak i ei chuan, ṭha taka a rawng i bawl theih nan Pathian i chawimawi tihna a ni.

Taksa insawizawi hi theihnghilh lo la. Tute pawhin kan mamawh a ni. I taksa i tihchak hian Pathian thiltum tihlawhtling turin i inṭanpui tihna a ni.

Taksa enkawl ṭhat chu zahawmna leh rinawmna a ni. Pathianin a siam a, Isuan a man a pe a, Thlarau Thianghlim a cheng thung a. Chuvang chuan ṭha takin enkawl ang che.

Ngaihtuah zui atan

* Zan mut ṭhat loh hian engtin nge chhunah a nghawng? Engtin nge hnathawhnaah, Inlaichinnaah leh rilru put hmangah nghawng a neih?

* Ei-in lamah chindan ṭha tak i neih theih nan vawiin hian engtin nge ke i pen ang?

* Taksa hriselna han tih hian, mi ṭhenkhatin an taksa an ngaihthah a, mi ṭhenkhatin an taksa an be bawk si. Hriselna inbuktawk chu engtin nge ni ta ang le?

[Lettu: Sangpuia]