RING LA I HMU ANG

_Hnuhma Chhinchhiahtlak Hnutchhiah_

-  Rick Warren 

-  December 9, 2024

“Rinna hi thil beiseite awm ngeia hriatna, thil hmuh lohte hriat fiahna a ni.” (Hebrai 11:1)

Rinna chu hmalam hun hmuh theihna a ni a. I hmuh hma hauh pawha i rinna hi a ni. Hebrai 11:1 chuan, “Rinna hi thil beiseite awm ngeia hriatna, thil hmuh lohte hriat fiahna a ni,” a ti.

I nuna thil thleng chu rinna mitin engtin nge i hmuh theih ang?

Mi tam zawk chuan hetiang hian an sawi ang, “Ka hmuh chuan ka awih ve ang.” Pathian chuan chutiang letling chiah chuan a sawi thung: “I awih hmasak chuan i hmu ang,” tiin. Hringnunah hian hmuh hmaa awih hmasak ngai tam tak a awm a ni.

Kum 1961 khan Soviet Union chuan vansanga a hmasa ber atan mihring an tir chhuak a. Leiah a lo let leh a, Soviet hruaitu Nikita Khrushchev chuan vansangah pawh kan lawn tawh a, mahse eng pathian mah an hmuh loh thu a puang a ni.

A hnu thla sawmnaah chuan U.S. in Mercury mission-ah John Glenn an lawntir ve thung a, Mercury chu vawi thum a hel kual a, chumi hnuah khawvelah a lo let a,  chuta a thusawi chu, “Khawiah pawh Pathian ka hmu zel! Galaxy-ah ka hmu a. Vansangah ka hmu a. Arsi-ah pawh ka hmu,” a ti. 

Tunge dik zawk le? An dik ve ve. Isuan hetihian a sawi, “Mi tu pawh an pianthar loh chuan Pathian ram an hmu thei lo vang” (Johana 3:3). I nunah thlarau lam hmasawnna a thlen hma chuan, i rilru zimna avangin i nunah Pathianin thiltih a tum pawh i hmu thei lo a ni. 

Wernher von Braun, US mite zinga vansang chanchin zirna lama scientist hmasa chuan, “Hun kaltaah khan rinna tel lo chuan hlawhtlinna ropui tak a awm thei lo,” a ti. 

Rinna avang chauhin scientist te pawhin thlaah mihring an lawntir thei a ni. Rinna avang chauhin architech-te pawhin in ropui tak tak an duang thei a, a chhan pakhatna, a tih theih ang tih an rin avangin. Rinna avangin Olympic-a infiammi te pawhin inbuatsaihnate neiin an hlawhtlin theih an inring a ni. Lemziaktu leh kertu te pawhin rinna neiin lem an ziakin an ker thei a ni. Kan hmuh hmain mi tuemaw chuan a rin a ngai a ni. 

I nunah Pathian thutiam leh a hnathawh i rin a ngai a ni. Vawiinah hian eng pawh hmachhawn la, Pathian hmangaihna, ngaihsakna leh hruaina chu ring ang che. Ring la, tichuan i hmu ang. 

Ngaihtuah zui atan

* Nangmah kaltlanga Pathianin hnathawh a tumnaah engnge rin i neih?

* I thil ruahmannaah i rinnain engtinnge nghawng a neih? 

* Engvangin nge Pathianin min hmuhtir hmain ring hmasa phawt se min tih nia i hriat?

[Lettu: Sangpuia]