PATHIAN HNA THAWK TURIN INNGAITLAWM RAWH

_I Nun Kal zel Atana Pathian Hmathlir_

By Rick Warren 

— Dec 4, 2024

“Tu pawh leilehnaa kut nghata hnung lam en chu, Pathian rama mi ni tlak a ni lo ve.” Luka 9:62

Mi tam tak chuan Pathian mi hman nih an duh thu min hrilh a, nimahsela an buai lutuk a ni. Anmahniin ngaihdan hran an nei a. Ruahmanna, duhthusam leh thil tumte an nei hran a, Pathian tan hun an nei thei tawh lo a ni. 

Pathian mi hman nih i duh tak zet a nih chuan, “Lalpa, eng hi nge kalsan tur ka neih? Eng hi nge paih ngai ka neih? Intlansiakna min buatsaihsak tlan turin engin nge min dal?” tiin zawt ang che.

Min daltu harsatna lian ber te zinga mi chu Isuan hetiang hian a sawi, “Tu pawh leilehnaa kut nghata hnung lam en chu, Pathian rama mi ni tlak a ni lo ve.” Luka 9:62

Heng a hnuaia mite hi i nuna daltu thenkhatte chu a ni:

*Mi dangte beiseina.* I nunah tu nge tih lawm hmasak i duh tih hi i tihfel phawt a ngai. Mi pakhat chiah i tilawm thei a ni.

*Tui zawng ti-a hun khawhralna.* Tui zawng neih chu thil sual a ni miah lo. Nimahsela thil pawimawh ber i tihna turah harsatna a siam che chuan, i thlak danglam a ngai a ni.

*Nun hlui.* I nun hlui chu liamtir thei loin; sual nia inhriatna, khakna leh lusunnaah i la tang a ni maithei e. Hei hi a ni i harsatna chu: nun hluiah i tang a nih chuan, tun hunah i lut thei lo ang a - Pathianin i tana hmalam hun a buatsaih pawh chu i nei thei lo ang. I nun hlui chu nun hlui a ni a. A zo tawh! Liamtir tur a ni.

Eng thil nge liamtir i duh le? Bible chuan 1 Korinth 10:23 ah, “Thil engkim tih a thiang a, nimahsela thil engkim tihin mi a siam tha lo,” a ti. Chumi awmzia chu thil zawng zawng hi an sual a ni hran lo; an tangkai vek lo tihna a ni zawk. Hringnun chu duhthlanna pahnih, “ Thil tha ka ti ang em?” emaw “Thil tha ber ka ti ang em?” emawah hian a innghat fo thin.

Sual chuan a ti khawlo thei lo che a nih pawhin, a tibuai reng ang che. Buai reng turin a hnuk lut ang che a, tichuan heng thil pawimawh tak tak - rawngbawlna, chanchin tha hril leh Pathian nena fianrial hun te pawh i insiam thei tawh lo ang. 

Thil engkim i ti thei lo. Eng nge pawimawh ber le! Inngaitlawm takin awm la, nangmah daltu che kalsan la, tichuan Pathianin a hmang ang che. 

Ngaihtuah zui atan

* I nunah eng thil nge pawimawh ber le?

* I nuna i thil dah pawimawh hmasak berte han ngaihtuah teh. Chung thil pakhat tal chuan Pathian tana thil tha ber i tihna turah an dal che em?

* Thil tha tak nia lang te hi engvangin nge Pathian tana thil tha ber kan tihna tur kawngah daltu an nih theih thin? 

*Vawiinah hian pakhatnaah Pathian dah rawh*

Thil hrang hranga kan nun inham buaitir hi a va awl tak em, heng - inlaichinna, hna, tuizawng, hmalam thlirna leh nun hlui avanga pawi tihna zawng zawngte nen. Thil dang danga kan nun kan hnawh khah hian, chatuan daih thil: Isua nena inlaichinna hi ngaihthah a awl thin khawp mai. Chu inlaichinna chu vawiin hian neih i duh chuan, hetiang hian tawngtai ang che:

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtikniah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawh tanna atana pawimawh te a thlawnin ka lo thawn ang che.

   

[Lettu: Sangpuia]