Mizoram State 10 Ball Pool Championship 2024 - 2025 zo fel
Aizawl | December 14, 2024: Mizoram State 10 Ball Pool Championship 2024 - 2025 chu vawiin tlai khan zawh fel a ni a, PB Liansangzuala, Dawrpui veng a champion.
Mizoram State 10 Ball Pool Championship 2024 - 2025 final hi vawiin tlai dar 3 khan khelh tan a ni a, PB Liansangzuala, Dawrpui leh Zonuntluanga, Electric Veng te an inhmachhawn a. 8 - 4 in PB Liansangzuala a chak a, Champion a ni.
Final hi Race to 8 (frame 8 la hmasa sa chak) a khelh a ni a. Frame hmasa ber Tekawka'n a la a, a dawtah Pba'n a la ve a, frame thumna Tekawka'n a la leh a, Frame lina atangin Pba'n frame 8na thleng, grame nga a la zawn a. Frame dinhmun 6 - 2 a ni a, Tekawka'n frame 9na leh 10na a zawnin a la leh a, 6 -4 a ni chiah a, chumi hnuah, Pba lo tho chhuakin, frame 10 leh 11na a zawnin a rawn la a, frame dinhmun 8 - 4 a ni ta a ni.
Mizoram State 10 Ball Pool Championship 2024 - 2025 Final-ah hian Mizoram State Sports Council (MSSC) Sports Promotion Officer H Laldinsanga chu khuallian a ni.
Semi finalist te hi Lalsangzela, Khatla South (vs PB Liansangzual) leh R Lalthazuala, Chaltlang (vs Zonuntluanga) te an ni.
Mizoram Snooker and Billiards Association (MSBA) buatsaih Mizoram State 10 Ball Pool Championship 2024 - 2025 hi December 9 atang khan khelh tan a ni a, vawiin tlai khan a hmawr bawk a ni ta a ni. Mizoram State 10 Ball Pool Championship 2024 - 2025 -ah hian player 40 chuang an tel a, MSBA Hall, Hawla Indoor Stadium, Pitarte Tlang, Republic Vengthlang-ah khelh thin a ni.
....
Post a Comment
He post chungchanga i ngaihdan lo sawi ve rawh: