BEISEINA NENA I NUN THEIH NAN PATHIAN THUTIAM HRERENG RAWH

_Beiseina Bulpui_

By Rick Warren 

— Dec 31, 2024

“Ka hmaah kumkhuain Lalpa chu ka hmu thin a, Ka mangan loh nan ka ding lamah a awm a ni; Chuvangin ka thinlung a hlim a, Ka lei pawh a lawm a; Chuvangin ka tisa pawh beisei takin a awm bawk ang.” Tirhkohte 2:25-26

Mite an beidawnna chhan ber pakhat chu hmalam hun an hriat theih loh vang hi a ni. Beiseina nena nun i duh chuan i hmalam hun chu Pathian thutiamah i innghah thiam a ngai a ni.

Insurance policy i lei a nih chuan, chu chuan huam thil bik a nei ṭhin. Engemaw harsatna a lo thlen chuan company lam chuan pek let an intiam ṭhin.

Chu policy chuan a huam tel chuan i thla a muang viau ang. Damdawi in awm man emaw car chhe siamna manah chuan i lungngai lo vang, insuarance lam chuan an pek dawn avangin, a huam chinah chuan buaina i nei lo vang.

Bibleah hian vawi 6,000 lai mai Pathianin thu min tiamna a awm a. Nimahsela kan hriat loh avangin kan la lungngai tho a ni. Hria ila chuan kan lungngai lo vang mawle.

Kum engzat nge harsatna i lo paltlang tawh le. Nimahsela thil pakhat i hriatsa a awm: Thil tawp dan i hria a ni tih hi! I thih hnuah engnge lo thleng dawn tih pawh i hria. I thih hnuah vanramah Pathian hnenah i awm dawn tih i hria, a chhan chu Isua thawhlehna chuan a thlentir avangin. Pathianin min tiam avangin a thleng ngei ang, Pathian a daw ngai si lo va.

Isua Krista chu Pathian Fapa leh khawvel Chhandamtu a ni tih i rin chuan Lalpa a nih angin zui ang che. 

Tirhkohte 2:25-26 ah Peteran Davida thusawi thawhlehna chungchang a sawi a, "Ka hmaah kumkhuain Lalpa chu ka hmu thin a, Ka mangan loh nan ka ding lamah a awm a ni; Chuvangin ka thinlung a hlim a, Ka lei pawh a lawm a; Chuvangin ka tisa pawh beisei takin a awm bawk ang.” 

Isua i zui a nih chuan, Pathian thutiam chauh i chang lo vanga, Pathian chenchilhna pawh i chang nghal ang. I chuanna lawng chu a lo kehdarh a nih pawhin Pathianin a awmpui che tih i ring thei ang.

I taksa pawh a hahchawl thei ang, a chhan chu khawvela thil chiang ber lo thleng tur leh a dawttu chu: Pathian Thu leh a thutiam chuan a chhandamin, a awmpuiin, a chenchilh ang che.

Ngaihtuah zui atan

* Pathian thutiam chu chhiar ringawt lo va, vawn chu engvangin nge a pawimawh le?

* Thlipuiin i nun a lo nuai chein, Pathianin a awmpui che tih i hriatin, thlamuanna i neih phah em? I lungngaih fo ṭhinna chhan hi i hria em?

* Hun liam tawhah khan Pathian thutiama i awmna leh a chenchilhna chuan engtin nge a hruai che?

*[Lettu: Sangpuia]*