NANGMAHIN I AWM LO, PATHIAN CHHUNGKUAAH I TEL

_I Nun Kalzel Atan Pathian Hmathlir_

By Rick Warren 

— Nov 27, 2024

“Chutiang bawkin keini tam tak ni mah ila, Kristaah chuan taksa pumkhat kan ni a: a mal malin inpeng tawn theuh kan ni.” Rom 12:5

Kohhran chuan i nunah Pathian a lal ber theih nan a pui che a, chubakah chuan i ringtupui te nena in inzawm theih nan a pui bawk che a ni.

Pathianin mahni chauhva nung turin a siam lo che a. He leia i awm chhung hian, Pathianin midang hmangaih zir turin a duh che a, Pathian chhungte chu a taka hmangaih turin a duh che a ni. Bible chuan, “Chutiang bawkin keini tam tak ni mah ila, Kristaah chuan taksa pumkhat kan ni a: a mal malin inpeng tawn ṭheuh kan ni.” (Rom 12:5). Pathian fa i lo nih hian, i ringtupui te chu i unaunu leh i unaupa te an ni nghal a ni.

Bible chuan taksa peng pakhat min ti a. Eng nge taksa chu? Rom 12:5 ah chuan: “Chutiang bawkin keini tam tak ni mah ila, Kristaah chuan taksa pumkhat kan ni a: a mal malin inpeng tawn ṭheuh kan ni.”

Pathian chhungkua - Krista taksa- nen inzawmna i neih loh chuan i thlarau nun a chak lo vang. Kutzungṭang pakhat tan ang mai a ni ang; taksa peng dang nen kutzungṭang chu a inzawm loh chuan a thi mai dawn si a. Chuvang chuan hna ṭha taka a thawh theih nan kutzung ṭang chu taksa peng dang nen a inzawm a ngai a ni. Chutiang chiah chuan thlarau lama i ṭhan theih nan leh siam i nihchhan ang taka i nun theih nan - Krista taksa - i Kristianpui dangte nen in inzawm a ngai a ni.

Rilru lam zirchiang mite chuan midang nena inzawmna nei lo te chuan ṭhian bulfuk tak an siam mawh riau tih an hmuchhuak a, midang aiin a let thumin an thih hma theih thu an sawi a ni. Tin, midang aiin a let li laia rilru lama harsatna an thawh hma tur thu an sawi a. Rilru lama natna phei chu a let nga laia an tuar hma bik tur thu an sawi. Chubakah a let sawm laiin rilru lam harsatna avangin damdawiin luh theihna kawng a inhawn zau bik thu an sawi bawk. Chuvangin kan inmamawh tawn takzet a ni.

I dinhmun chu engpawh ni se, i ringtupui dangte nen inzawmna neih tum rawh. Kohhran chhungkuaah tel la, pawl bik zawmpui neia. Inzawmna ṭha tak siam rawh u.  Ephesi 2:19 chuan, “Chutichuan, tunah mikhual leh mi cham mai in ni tawh lo va, mi thianghlimte nen chuan tualkhat leh Pathian chhungte in ni ta zawk a ni”.

Ngaihtuah zui atan

* Engvangin nge Pathianin hmangaihna chu ataka lantir turin a duh che? Engtin nge i lantir ang?

* Krista taksa i ni tih i inhriat hnu hian i nun awmzia chu engtin nge a lo danglam tak le?

* I ringtupui dangte nen in inzawm hnu hian engtiangin nge i thlarau nun a ṭhan le?

*Khawiah nge chatuan hun i hman dawn?*

Kan vai hian kan sual vek a – mahse Pathian chuan a hmangaihna leh ngaihdamna a lantir a. Bible chuan vanram chu Pathian rinna Fapa, Isua Krista kaltlanga in neih chauhin in lut thei ang a ti a. Vanram chu nangmaha i hlawhchhuah mai theih a ni lo. “Rinna avanga khawngaihnaa chhandam in ni; nangmahni thawhchhuah a ni lo va, Pathian thilpek a ni; thiltih avang a ni lo ve, chutilo chuan miin an chhuang dah ang e.” Ephesi 2:8-9

I sualna te i puang duh aniha, i nunah Isua i thlang duh anih chuan, heti hian tawngtai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtikniah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawhtanna atana pawimawh te a thlawnin ka lo thawn ang che.

*[Lettu: Sangpuia]*