Mizoram Snooker 6 Red Championship 2024-2025 a hmawr bawk; Lalrina Renthlei a champion

Mizoram Snooker 6 Red Championship (2024-2025) Champion - Lalrina Renthlei

Aizawl | Nov 23, 2024: Mizoram Snooker & Billiards Association (MSBA) buatsaih Mizoram Snooker 6 Red Championship (2024-2025) chu vawiin tlai khan a hmawr bawk a ni a, Lalrina Renthlei; Tuikhuahtlang a champion.

Mizoram Snooker 6 Red Championship (2024-2025) Final hi vawiin tlai dar 4 khan khelh a ni a, Race to 4-a khelh a ni. Final-ah hian Lalrina Renthlei; Tuikhuahtlang leh Lalsangzela, Khatla South te an inhmachhawn. MSBA player chhuanvawr pahnih inhmachhawn an ni a, an inkhel a hmuhnawm a, a entu lam pawh an tang hle.

Match hmuhnawm tam an entir a, Lalrina'n point 67 - 0 leh 62 - 1 a a zawna frame 2 a lak hnuah Zela'n 0- 49-in frame khat a la a, chumi hnu chuan, Lalrina'n 56 - 26, 31 - 28 in a zawnin frame 2 a la leh a, 4 - 1 in Lalrina a chak ta a,

Semi Final match hmasa zawkah Lalrina Renthleiin 4 - 1 in PB Liansangzuala, Dawrpui a hneh a. match hnuhnung zawkah Lalsangzela'n Samson Lalnuntluanga, Venghlui chu 4 - 0 in a hneh a ni.

Mizoram Snooker & Billiards Association (MSBA) buatsaih Mizoram Snooker 6 Red Championship (2024-2025) hi November 18 tlai aṭang khan khelh tan a ni a, MSBA Hall, Hawla Indoor Stadium, Republic Vengthlang-ah khelh niin, Mizoram hmun hrang hrang aṭangin player 35 an tel a ni.

Mizoram Snooker 6 Red Championship (2024-2025) Final hi Youtube-ah Explore Mizoram channel-ah live a ni.

Semi Finalist-te:

PB Liansangzuala; Dawrpui leh Samson Lalnuntluanga; Venghlui

Quarter finalist-te:

Lalbiaksanga; Mission Vengthlang, Lalchhandama; Dinthar, K Lallawmkima; Khatla South leh Lalzawngkima; Republic Vengthlang.