Aizawl | November 28, 2024: Aizawl South II Congress hruaitute'n vawiin khan Rokunga Hall, Venghnuaiah intawhkhawmna hun an nei a. He hun hmanpuitu Dr. Lalmalsawma Nghaka chuan Handholding Policy hian mipui thleng phak lovin, an duhsak zawngte chauh banah an kai a ti. Mipui nawlpui ban phak lohin ZPM Sawrkar hian a ban a phar san ta emaw tih mai turin an awm a, mi nawlpui banah an kai ang tih an hlau niawm fahranin thlai thar an lei dan turah te, hand holding loan pek dan tur chungchangah te thil a harsa zawngin an ti thiam a, hetiang a nih mek lai hian party-a an hotu rualte chu nihna pawimawh tak tak pe-in, Adviser to CM te, Board Chairman te, Consultant te, OSD te leh adt. dinhmun tha zawk, hlawh sang zawk an neih theih nan an banah an kai thung a ni. Restricted tender maksak te kalpuiin, work supervisor tih hming chawi tirin an mi duhsak zawng te contract leh supply hmangin an dinhmun an siam len sak thur thur mek a, "Kalphung Thar" an tih hi Kalphung Maksak tak a ni chho mek a ni.
Dr. Lalmalsawma Nghaka chuan Mipuite hnenah vote zawn nan CM Special Package an tawktarh a, a kalphung hian mipui thleng phak lovin, an duhsak zawng mi tlemte tan an siam a, inthlan apiangin vote zawn nan ber hmangin, “Rulh ngai lo loan” tiin an campaign mek a ni. Mahse, he CM Special Package an tih dawng tur hi an mi duhsak zawng mitlemte te tan niin a lang leh zel a ni.
Thalaite tan Handhold loan an sawi hi Central sorkar scheme awmsa pangngai PMEGP, CGTMSE leh adangte an rinchhan a, handhold loan hian kalphung a nei lo va, he loan diltute hian Handhold loan kaltlang lova, mimal anga mahni a an dil theih thil a ni, a ti bawk.
Dr. Mala chuan Congress kan sorkar lai khan Health Care Bill khulchhuah nan a rei ber ah thla khat vel bak hun a duh lo va, MNF ah khan a kuma kum nghah a ngai a, ZPM hian an sorkar atanga thla 9-ah Rs. Nuai 1 an rawn siam ve chauh a, Cheng nuai 1 hi natna khirh tuar tan a beitham lulai a ni tih thu a sawi bawk.
Tunlaia sorkar hnathawk an vauna a thleng mek a, kan Chief Minister Pu Lalduhoma'n sorkar hnathawk chhawrtlak loh te ban mai tha kan ti a ti a, a dikna chen a awm a, zir chiang ngai tak thil a ni maithei. Sorkar hnathawk ban an tum a nih chuan mipuite tana tangkaina awm lo, mipuiin ram tana an hnathawh hriat tur awm si lo Adviser to CM, Consultant, Board chairman, Consultant leh OSD eng emaw zat awm te hi ban hmasa phawt rawh se, an ni enkawl nan hian mipui sum tam tak senral a ni. A duhsak mite hum ran tum a, sorkar hnathawkte tlin lohna leh fel lohna zawng reng renga an hmanhlel hi a pawi hle, an mahni atangin bul an tan a ngai a ni, a ti.
Dr. Mala chuan Congress khan NLUP kan sem dawn khan keimahni kan inhrek hmasa a, thil tih tur hi kan sawi pung pung ve lo va, a tihin kan ti chat chat thin. Tuna CM leh a hmasa zawk CM te hian sawi thiam lam ni lovin, a tiha tih a ni zawk tih lo hre rawh se tiin a sawi.
He political training hi Pu H. Lalduhawma Aizawl South II President-in a kaihruai a, Aizawl District Congress Committee hotu eng emaw zatin he hun hi an hmanpui bawk a ni.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: