APEX Bank Branch 30-na New Colony Branch Siaha hawng

Aizawl | November 28, 2024: Vawiin khan Mizoram Cooperative Apex Bank branch 30-na ni turin New Colony Branch, Siaha-ah hawn a ni.

Pu M. Laikaw, Chief Executive Member, Mara Autonomous District Council-in Branch thar hi a hawnna hun a nei a. Siaha khuain Bank branch an nei thar leh chu Mara mipuite leh District pumpui tana malsawmna a ni tiin Apex Bank chu ram neitute Bank anih thu uar takin a sawi. Financial Literacy-ah Siaha District an hniam avangin Branch thar hian nasa taka hmasawnna a thlen a beisei thu a sawi bawk.

Additional DC, Pu Abraham Beirazi Khithie chuan Apex Bank chu mipuite tan dawr a nuam a tih thu sawiin hei hi chhawmnung zel turin Branch thar chu a fuih a. District pumah Financial Literacy Campaign nasa zawka neih a pawimawh thu leh PACS Cell te tam zawk din a tul thu a sawi bawk a ni.

Siaha khawpuiah hian kum 1986 khan MCAB Saiha Branch hawn a ni a. Khawpui thang zel leh mipui mamawhna san zel avangin New Colony vengah Branch thar hi hawn belh a ni leh ta a ni. Hawnna inkhawm hi Pu Lalrinchhana, Vice Chairman MCAB in a kaihruaia, Pu H. Lalramdina, Assistant General Manager-in Technical Report te pein Pu P. Lalsawmliana, General Manager-in lawmthu sawina hun hmangin programme hi a khar a ni.