MZP-in pension rawih nawn na zawka dodal tum

Aizawl | October 12, 2024: MZP-in pension rawih nawn na zawka dodal an tum thu vawiin khan thuchhuah siamin an tarlang.

Mizo Zirlai Pawl, General Headquarters Executive Committee Meeting vawi 636-na MZP Conference Hall-a neih chuan, tunhnaia Department hrang hranga officer pension tawh rawih chungchang leh Zirlaite Ni lo thleng tur chungchang a ngaihtuah.

Meeting chuan, tun hnaiah officer pension tawh rawihnawn leh pension tawh mai tur ruai nawn tura file kallai a awmin a hria a. Hei hi uluk taka chhuichian a, pension tawh rawih nawn a nih loh nan chak taka hmalak nise tiin a rel. MZP chuan Mizoram sawrkar hnuaia hna thawk zingah pension tawh rawih nawn an awm fo thin chu tunhma atangin tha a tih loh thu a sawi fo thin a. Pension tawh rawih nawn a nih avanga, bang tura nawr pawh a lo nei zauh zauh tawh thin a ni.

MZP chuan, sawrkar hnathawkte chu an hnathawh hun chhunga thahnem ngai taka thawk turin ngen a. An pension tawh hnuah erawh chuan thalai hna zawng mekte kian turin duh a ni. MZP chuan officer pension tawh, thiltih theih fal bik avanga inrawih nawn ang chi a awm loh nan theihtawp chhuahin hma a la dawn a ni.

Meeting chuan October ni 27 “Zirlaite Ni” hi Pathianni a nih avangin, ni 26 October, 2024 hian Aizawl khawpui chhungah Zirlaite Ni pualin “Ruihho do kawngzawh” neih nise a ti a. Kumin Zirlaite Ni thupui atan “Ruihhlo- Zirlaite hmelma” tih hman a ni ang.

.