HARSATNA I TAWK A NIH PAWHIN MAK TI SUH

_Tihnghin rual loh_

By Rick Warren 

— Oct 08, 2024

”Heng thu hi in hnenah ka sawi tawh hi, keimahah hian in thlamuanna turin. Khawvelah hian hrehawmin in awm thin; nimahsela thlamuang takin awm rawh u, keiin khawvel ka ngam ta, a ti a." Johana 16:33

I nunah harsatna hrang hrang ila tawk dawn a. Khawvela i nun chu chhuk leh chho ang maia rualrem lovin kawng zawh tur ber pawh hre lo va i awm chang pawh a awm ang.

Chung harsatnate chu lo thleng mai thei ang chi-ah dah tur a ni lo. Lo thleng ngei ngei tur a ni zawk. Isua pawhin chung avang chuan mak kan ti tur a ni lo a ti a. Hetiang hian min hrilh a ni, “Heng thu hi in hnenah ka sawi tawh hi, keimahah hian in thlamuanna turin. Khawvelah hian hrehawmin in awm thin; nimahsela thlamuang takin awm rawh u, keiin khawvel ka ngam ta, a ti a.” (Johana 16:33).

He khawvel chhe tawh tak karah hian harsatnate chu kan tawk ve tur a ni reng a ni. Vanah chuan engkim a famkim a. Leiah erawh chuan sual avangin engkim hi a kehsawm a ni. Inlaichinna a kehsawm a, mimal ang pawh hian kan kehsawm a ni. Sumdawnna a kehchhia a. Khaw awm dan pawh a kehchhe tawh a ni.

He leiah hi chuan engkim hi a kehchhiat tawh avangin, thil reng reng hi a famkimin kan beisei thei lo a ni. I nunah thil ṭha lo a lo thleng a nih pawhin, "eng vang nge kei kher?" ti lo vin, he leiah kan la cheng a, "eng vangin nge ka chungah a thlen loh bik ang?" i ti zawk tur a ni.

Engpawh ni se, eng harsatna pawh tawk la Isuan engkim a thuhnuaiah a dah a ni tih hria ang che. Isuan, “Thlamuang takin awm rawh u. Keiin khawvel ka ngam ta," a ti a ni. Amah i rin chuan, chu thlamuanna chu i nei thei ang. 

Rom 8:28 ah pawh kan hmu a, "Pathian hmangaihtu, amaha ruat anga a kohvate tan chuan, an ṭhatna turin engkimin a thawhsak hlawm ṭhin tih kan hria.” Chu chuan khawvel thil duhawm lo ber a huam tel em? A huam tel vek. I sualna ngei pawh a tel a ni.

Pathianin khenbehna chu thawhlehnaah a chantir thei. Thil ṭha lo pawh hi thil ṭhaah a chantir thei a ni. Tu pawhin thil ṭha aṭangin thil ṭha vek an la chhuak thei a. Nimahsela Pathian chauhin thil ṭha lo hi thil ṭhaah a chantir thei a ni.

I nunah eng harsatna pawh tawk la, Pathianin thil ṭhaah a chantir thei tih ring rawh. Chu vang chuan harsatna i tawk a nih pawhin mak ti a  lungngaih ai chuan hriatthiamna leh beiseina nei chungin hmachhawn zawk rawh.

Bible chuan, “Duh takte u, in zinga fiahna nasa tak lo awm, nangmahni fiahna tura in chunga lo thleng hi, thilmak in chunga lo thleng angin mak ti suh u. Krista tuarnaahte tuarpuitute in nihzia ang zelin lawm zawk rawh u; chutichuan a ropuina a lo lan hunah chuan nangni pawh hlim takin in lawm thei ang.” (1 Petera 4:12–13).

Ngaihtuah zui atan

* Harsatna i chungah a lo thlenin, eng vang nge kei kher? Eng vang nge mi dang chungah a thlen loh ti tein i sawi ṭhin em? 

* Engtik lai khan nge nangmaha thil ṭha lo chu Pathianin thil ṭhaah a chantir?

* Tunah hian eng thil ṭha lo vin nge lungngai tura siam mek che? Pathianin thil ṭha lo chu thil ṭhaah a chantir thei tih i hriat hian engtin nge Pathianah beiseina a pek che?

*[Lettu: Sangpuia]*