"Council sum hi state sorkarin duh duha a chinpawr theih a ni lo - State sorkar kaltlang lovin council budget let engemaw zat kan hai chhuak thei,"MNF Sr. Vice President Dr R Lalthangliana

"Council sum hi state sorkarin duh duha a chinpawr theih a ni lo - State sorkar kaltlang lovin council budget let engemaw zat kan hai chhuak thei,"MNF Sr. Vice President Dr R Lalthangliana

Aizawl | October 22, 2024: MNF Senior Vice President Dr.R.Lalthangliana chuan vawiin October ni 22, 2024 (Thawhlehni) hian Sinlung Hills Council inthlanna Dt.05.11.2024 a neih turah campaign-in Suangpuilawn, Lamherh, Khawlek, Vanbawng, Zawngin leh Phuaibuang khuate a fang.

Heng hmunahte hian MNF Senior Vice President chuan Sinlung Hills Council inthlanah MNF leh a thawhpui HPC (R) an tlin ngei a beisei thu a sawi. Uluk deuha MNF party-in a ngaihtuah hnuah HPC (R)-te nen thawk ho a, thahnem ngaitlang taka an thawhhona boruak a tha chu lawmawm a ti a, HPC (R) chungah thinlung takin MNF General Headquarters hmingin lawmthu a sawi.

Dr.R.Lalthangliana chuan, Autonomous Council hi India dan angin mahni a ro inrelna felfai tak nei niin, State sorkarin duh duha a chinpawr theih a nih loh thu a sawi. "Sorkarna hi kan siam anih chuan kan enpui zel dawn che u a, dan leh hrai kan hre si a. Kan council pawh sum leh pai hmalakna kawng hrang hrangah kan vilpui zel dawn che u a ni. Sinlung Hills Council budget piah lamah state sorkar kaltlang ngai kher lovin special project lian tham tak tak kan siampui che u ang a, thil lian tak tak tihdan kan hria, hma kan la dawn a ni," a ti.

Council hi a zahawm a, council budget chu autonomous anih angin state sorkarin sum hreka tihbuai chi a ni lo tih leh chu chu Dan-in a phalloh thu sawi. "In budget let engemaw zat kan hai chhuahpui dawn che u a ni," a ti.

"Health Minister ka nih lai khan ZMC-ahte sum tam tak state sorkar sum hmang lovin hmasawnna hnathawh tur ka pawtlut a. Champhai, Serchhip leh Kolasib-ahte Hospital lian din nan cheng nuai 2000 man vel theuh, Mamit-ah Damdawi In lian khum 100 awm theihna cheng nuai 1700 mante state sorkar sum hmang lovin development lian tham ka hai chhuak teuh a nih kha. Khang lo pawh kha state sorkar sum hmang lovin Zoram hmun hrang hrangah hmasawnna hna lian tham tak tak kan thawk tam hle a ni," a ti bawk.

"CSR atang pawhin council thuneihna hmangin sum pawh chhuah dan kan hria a, he lai bialah hian heng zawng zawng kan tih theihna tur chuan kan candidate-te in thlantlin ngei ngei a tul a ni," MNF Senior Vice President chuan a ti bawk.