ZORO kaihhruainain Chin hruaitute'n inremna thuthlung ziak

Aizawl | September 21, 2024: Zo Re-Unification Organisation (ZORO) kaihhruainain vawiin khan Chin hruaitute'n inremna atan thawhdunna thuthlung ziak.

ZORO kaihhruainain vawiin khan Chin National Front (CNF), Interim Chin National Consultative Council (ICNCC), Chin Brotherhood leh Chinland Government ten inremna kawng zawh dan tur an sawiho.

He sawihona leh inkawmna hi Adviser to CM (Political) Lalmuanpuia Punte, MLA chamber-ah neih a ni a. Chawhnu dar 12:00 khan ṭan niin, tlai dar li chanve vel khan thawhdunna thuthlung hi an ziak a ni.

An inremnaah hian, "buaina leh harsatna a lo awm pawhin tharum leh ralthuam che lek zâwnga hmalak loh ni se." tih a tel a, "inremna tluantling a awm theih nân a ṭul dân azira inbiakna neih leh ni se," tiin thu an ti tlu bawk.

Vawiin ni 21, September 2024 khan ZORO bultumin inremna thuthlung sawihona hun hman a ni a, Pu R. Sangkawia ZORO President in a kaihruai a, Pu Rohmingthanga Kawlni Vice President in hunserh a hmang a ni. Vawiin inremna thuthlung sawihona hunah hian Burma ram Chin Statea kan unaute Chin National Front (CNF), Interim Chin National Consultative Council (ICNCC), Chin Brotherhood leh Chinland Council te an tel a ni. Chin State Burma chhung a cheng unau leh unau inkarah imhmuhthiam lohna awmin silai hial lekin an lo inkap tawh a, nunna chan pawh an awm a ni. Hei hi ZORO chuan tha ti lovin inremna kawng a zawng ta a ni.

Pu L. Ramdinliana Renthlei ZORO General Secretary chuan ZORO in remna palai hna an thawh chhan sawiin, “Zofate hi unau vek kan ni a, inhmu thiam lo tur kan ni lo a, tangrual tur zawk kan ni. Unau kan nih angin inthen thei kan ni lo a, indo thei pawh kan ni lo. Zofate chu khawi hmunah pawh awm ila lungrual taka awm tur kan ni a, keimahni leh keimahni hi hmelmaah kan insiam tur a ni lo a, hmelma thuhmun nei tlang zawk tur kan ni. Zofate hi Pathian ringtu kan ni a, Pathianin min pui anga engtik niah emaw chuan inremin kan la awm anga kan la insuihkhawm vek dawn a ni.”a ti

He huna thusawitu Pu Lalmuanpuia Punte, Adviser to CM & Vice President ZORO chuan, “Vawiina hian inremna lam hawiin ke kan pen a, remna palai in rawn kal tha a, a lawmawm hle a ni. Kan unaute inrem hi Mizoram sorkar duhdan a ni a, vawiina kan inkawmkhawmna pawh hi sorkarin min hriatpui a ni. Sorkarin ZORO kaltlangin remna palai hna kan thawk a ni. India Sorkar pawh hian in inrem hi a duh a, India hian tnapuina min pek pawh a duh a ni.” a ti.

ZORO huaihawta inremna thuthlung sawihona hi tluang taka neih a ni a, Pu Dr. Lorain Lalpekliana Chinzah, Adviser to Chief Minister in telpui a. A hnuaia mi ang hian thawh dunna thuthlung siam a ni.

THAWH DUNNA THUTHLUNG

Keini Chin National Front (CNF), Interim Chin National Consultative Council (ICNCC), Chin Brotherhood leh Chinland Government te 21st September, 2024 (Inrinni)-a Zo Re-Unification Organisation (ZORO) huaihawta inkawmkhawmna nei te hian uluk taka kan sawi ho hnuah a hnuaia tarlan te hi thinlung takin kan pawmin kan zawm tlang tih kan puang e.

1. Keini Zofate (Chin-Kuki-Mizo) hi thlahtu thuhmun, ṭawng khat hmang (same language-different dialect), nunphung, serh leh sang inkhawih pawlh, beiseina thuhmun vuana dam leh tlâng khatah, thih leh ruam khatah ti ṭhin unau kan ni.

2. Kan ram leh hnam tana hma kan lâkna kawngah kan ṭhahnemngaih luat avânga unau kan inhmu thiam lo hi pawi kan ti a, tun hnuah thleng tawh lo se kan duh.

3. Tun hnuah buaina leh harsatna a lo awm pawhin tharum leh ralthuam che lek zâwnga hmalak loh ni se.

4. ZORO hmalaknaa inremna thuthlung sawi ho hi ṭha kan tiin kan pawm a, inremna tluantling a awm theih nân a ṭul dân azira inbiakna neih leh ni se kan ti.

5. Inremna Committee siam ṭha kan ti a, meeting leh hunah inremna Committee siam ni se kan ti.

(R. SANGKAWIA)

President, ZORO

(L.RAMDINLIANA RENTHLEI)

General Secretary, ZORO

(THANG NING KEE)

Leader, CNF

(SALAI LIAN LUAI)

Leader, ICNCC

(PA THANG)

Leader, Chinland Government

(PAW SILA)