Retailer-ten buhfai chi hnih dawng

Aizawl | September 19, 2024: Tunhnai hian Retailer ten bufai chi hnih an dawng a, mipui hnenah chawhpawlh leh chawhpawlh lovin an sem.

Hetianga bag chi hnih an dawn chhan hi Retailer lam chuan an hre lova, a chhan sawi tur an hre hlawm lo.

Aizawl khawpui chhunga veng ṭhenkhata Buhfai sem lai tukin khan en kual a ni a, Retailerte hian buhfai chi hnih hi an lo dawng ngei nia hriat a ni.

Heng buhfaite hi Satha ip leh Buara ami te an ni a, Satha ip ami zawk hi a rawng a ukin a chhe zawk zel niin hriat a ni bawk.

Retailer ṭhenkhat chuan, "Bag kan lak ṭhin zatve hi Buara min pek laiin, a zatve hi Satha ip min pe," an ti a. Veng pakhatah erawh, "hmun thuma ṭhena hmun hnih hi Satha ip a ni a, Buara ami erawh hmun thuma ṭhena hmun khat chauh a ni thung!" an ti.

Heng buhfaite hi a ṭhat dan a inang lo hle a, buhfai lam hrechiang pakhat chuan, satha ip zawk hi a man a tlawm zawk niin a sawi.

Retailer pakhat chauhah hetiang thil hi a thleng lova, retailer hrang hrang a ni a. Mizoram chhunga Retailer zawng zawng hian ip chi hnih hian an dawng vek em tih erawh hriat a ni lo thung.

Heng buhfaite hi, retailer ṭhenkhat chuan Satha ip zawk hi a chhiat zawk avangin a malin an sem ngam lova Buara ami nen chawhpawlhin an sem niin an sawi a. Hetihlai hian, ṭhenkhatah erawh, Buara ami zawk a hnuai leh kil lama an lo dah avangin Satha ip ami hi a hlangin an sem tho niin thu dawn a ni.