PWD Minister leh Supply Minister-in NH - 6 Kawnpui - Khamrang inkar kawng chhe siam an enfiah

Khamrang | September 21, 2024: Vawiin khan PWD Minister Vanlalhlana, leh Supply Minister B Lalchhanzova ten NH-6 Kawnpui leh Khamrang khaw inkar kawng chhe siam mek chu a hmunah kalin hnthawh dan leh kawng dinhmun an en fiah a, PWD hnathawktu ten ngawrh taka kawng chhe siam hna an thawhna zarah motor kaltlang theiha a chhelaite siam that a ni.

PWD Minister Vanlalhlana chuan,"Kumin hian kum dang zawng aiin ruahtui tla a tam a, chu chuan Mizoram hmun hrang hrang kawngpui a tichhe nasa hle a, hmun 573 velah kawngpui hnawha leimin a awm a ni. NH-6 kawngpui pawh nasa takin a ti chhia a, helai kawngpui hi Mizoram ei leh bar chawkluhna ber a nih avangin mipui nunphung a tikhaihlaka Mizoram sorkar pawhin mawhphurhna lain theih tawpin kawngpui siam hna kan thawk mek a, mipuite pawhin sorkar hmalakna ah tha thawhin Central YMA, NGO pawl hrang hrang, Mizoram Truck Owner Association, Mizoram Truck Driver Association, Comercial Vehicle Owner Association, Kolasib DC leh kan Police te bakah khawtlang hruaitute an tangkai hle a, an chungah lawmthu ka sawi a ni," a ti.

Vanlalhlana chuan, "Tuna Sorkarin kawng chhia a thuamthat mek hi a chhe zualpui siamthatna chauh a la ni riha, furlai a nih avangin duhthu sama siam theih a la ni rih lo, ei leh bar leh nitin mamawh a lo luh theihna tur hi kan ngaihtuah ber rih a, Supply Minister Pu B.Lalchhanzova nen inbiain vawiinah hian he lai hmuna kawng siam hna dinhmun kan en duna, hun a lo kal anga tha zawk leh mawihnai zawkin Sorkarin kawngpui hi a thuam tha zel dawn a ni," a ti.

Supply Minister B Lalchhanzova chuan, "Khaw awmdan a zirin zanin hian bungraw phur motorte pawh a tahtawla chhuah theih kan beisei a, PWD Minister leh department Officials te chungah lawmthu ka sawia, mipuite harsatna leh mamawh hriaa, theih tawpa hna an thawhna kawngah fak an phu hlein ka hria. Tunah hian Mizoram lam panin tuialhthei phur motor an rawn chho mek a, tin Silchar lamah pawh motor engemawzatin tuialhthei phurturin an dawh mek a, harsatna dang a awm loh chuan hun reiloteah mipuite mamawh phuhruk thuai kan inbeisei a ni," a ti.

He hunah hian, PWD Chief Engineer (Highways) Er H Zoramliana, Er. R.Lalduhthlanga Senior Executive Engineer, Er.Robin Lalrinawma SE bakah I&PR atang leh Media Dept. ZPM General Hqrs te leh Kawnpui VC-III ten Minister te hi an tawiawm a, Kawngchhe siama hnatlang Khamrang YMA te hnenah Minister te hian thingpui lumna tur sum leh pai an hlan bawk.