Mizoram tan mel lung thar - Miss Universe Mizoram hmasa ber atan Roneihpuii thlang

Aizawl | July 5, 2024: Mizoram history-ah thil thleng liantham niin, Roneihpuii chu Miss Universe Mizoram hmasa ber atana thlan a ni a, hei hi Mizoram pageant history-a thil pawimawh tak a ni.

Nimin (July 4)-a Emerald Hotel, Aizawl-a neih grand finale-ah hian nula thluak tha, lu zo tak leh nalh em em Roneihpuii, Bungkawn a khawsa mek, Leitlangpui Chhuak, kum 23 chu Mizoram aiawh tuma penchhuakte zinga a chungnung ber niin, Miss Tourism India 2023, Ashmita Chakraborty chuan Miss Universe Mizoram lallukhum a khumtir.

Roneihpuiin he lalukhum a khum theih nan hian a thawkrim hle a, a sakruang a mawiin, a stage presence a zangkhaiin a hmuhnawm a, a zawhna chhan leh thusawite a puitling em em bawk a, hei vang hian endiktu te a hmin ta a ni.

Miss Universe Mizoram a nihna hian Roneihpuii chu Miss Universe India pageant-ah Mizoram aiawh hmasa ber tur a nih tir a, Mexico-a neih tur Miss Universe competition-ah tel turin India ram state dang nulate nen inelna an nei leh ang.

Miss Universe Mizoram intihsiakna hi CG Entertainment buatsaih niin, Mizoram cultural heritage tarlanna ropui tak a ni a. He inelna ah hian National Health Mission, Mizoram chu main sponsor niin, Vestige Marketing Pvt Ltd leh Babie Construction and Consultancy Services te chu co-sponsor an ni.

Roneihpuii hnehna chan hi Mizoram pageant history-ah a chuang reng tawh dawn a, Miss Universe India leh beauty pageant dangte a Mizo hmeichhia la tel zel tur te tana sul sutu pawimawh leh ropui tak a ni.

Miss Universe Mizoram 2024 hi Zonet leh LPS Vision-ah te MHIP Day, May ni 6, zan dar 8:00pm -ah mipuite tana en theih turin chhuah ani ang.

Miss Universe Mizoram 2024 endiktu te: Ashmita Chakraborty, Miss Tourism India 2023. Meriam L Hrangcal, Entrepreneur, Principal of Alpha World School. Amjad Khan, Operations and Marketing Director of Miss Universe India Organisation.