Mizoram State 6 Red Snooker Ranking Tournament 2024-ah Lalsangzela a champion

Aizawl | July 20, 2024: Mizoram Snooker & Billiards Association (MSBA) buatsaih Mizoram State 6 Red Snooker Ranking Tournament 2024 chu zanin khan zawh fel a ni a, Lalsangzela, Khatla South a champion.

Mizoram State 6 Red Snooker Ranking Tournament 2024 final-ah hian Khatla South veng mi ve ve Lalsangzela leh K Lallawmkima te an inhmachhawn a. Lalsangzela chu 6 - 2 a chak a ni.

K Lallawmkima'n 39 - 0 in Frame 1-na a la a, frame 2-naah 31 - 23 in Lalsangzela a rawn invawrh a, frame 3-naah pawh Zela hian 37 - 1 frame a la leh a, Zela hian frame 4-na, Frame 5-na leh frame 6-na te 32 - 8, 46 - 17 leh 47 - 4 a Lalsangzela a chak hnu leh frame 5 a lak / chak hnuah, frame 7-naah Lawma a rawn che tha leh a, 48 - 10 in a frame hnihna a la leh a, mahse, Lalsangzela'n frame 8-naah 47 - 19 in frame a la leh a, Lalsangzela hi 6 - 2 in a chak ta a ni.

Nizan khan semi finals khelh niin, race to 5 a khelh a ni a, Lawma hian 5 - 4 in a hneh a, Lalsangzela hian a khelhpui 5 - 1 in a lo hneh tawh bawk a ni.

July 15, 2024 atanga tan, Mizoram State 6 Red Snooker Ranking Tournament 2024-ah hian Mizoram hmun hrang hrang atangin Snooker player 30 chuang an inlan a, zanin khan a hmawr bawk a ni ta a ni.

Mizoram State 6 Red Snooker Ranking Tournament 2024 hi MSBA Hall, Hawla Indoor Stadium, Republic Vengthlang-ah khelh a ni a. Mizoram State Sports Council-in a sponsor a ni.

Khatla South tlangval Lalsangzela hi Jan 23 - 27, 2024 chhunga buatsaih 'Mizoram State 6 Red Snooker Ranking Tournament 2024'-ah Champion a ni a.

March 18 - 30 chhunga buatsaih Mizoram State 9 Ball Pool Championship-ah Champion a ni a. May 20 - 25 chhunga neih zawh tak Mizoram State 9 Ball Pool Ranking Tournament 2024-ah khan Finalist (Runners Up) a ni a.

June 24 - 29 chhunga buastaih Mizoram State 10 Ball Pool Ranking Tournament 2024-ah Quarter finalist a lo ni tawh a. Tunah hian, July 15 - 20 chhunga buatsaih Mizoram State 6 Red Snooker Ranking Tournament 2024-ah a champion leh ta a ni.