MI FING CHUAN MIDANG RILRU AN DAWN PUI ṬHIN

_Min Ti Danglam Ta_

-  Rick Warren 

-  July 24, 2024

“Chung lam atanga finna lo chhuak erawh chu a tirin a thianghlim phawt a, chumi hnuah chuan inrem a duh a, a nunnem a, a tih nuam a, zahngaihna leh rah thain a khat a, thlei bik a nei lo va, a vervek lo a ni.” (Jakoba 3:17)

Inlaichinnaa miten an tihsual fo thin thil pahnih i hria em? Pakhatna, a sawitu rilru pawh ngaihtuah hmasa lo vin an chhanglet nghal thuai thin. Pahnihna, a dik leh dik lo pawh ngaihtuah lo vin mi kan va hnial leh ngawt thin.

Engtin nge ṭan kan lak theih ang: Mi dang ngaihtuahna nei ang che.

Kan tihsual fo thin atangin engtin nge tan kan lak theih ang zir chiang ang aw.

*Pakhatna #1: Hriatthiam tum hmasa lo va chhan let.*

Mi thenkhat chuan mi thusawi hi kan awih nghal em em a, a phenah hian engnge awm tih kan ngaihtuah ngai lo a ni. Mi a thinrim chuan, a sawi tum loh deuh pawh a sawi palh thei a ni. An tum loh deuh pawh an sawi uar vak thei a ni. An thu ngaihthlak vak ai chuan, an sawina chhan kha ngaihtuah tel ve a ngai a ni. Mi thenkhat chuan an tum loh deuh thil an sawi thin - mahse an rilru puthmang hi chu a ngai reng a ni. 

Inlaichinna tha siam tur chuan, mi dang rilru put dan tur i dâwn ve a ngai. I fate emaw, i kawppui emaw, thenawm leh i pu te thusawi ringawt chu ngaihtuah suh - an tawngkam phena thil awm chu ngaihtuahpui zawk rawh. Eng vangin nge an an au vak, mawi lo taka an lan kan tih chuan, “Na ka nei a ni” an ti pawh a ni mai thei a ni. Mi an nat chuan mi dang an tina duh bik hle. Mi nunrawng te hi a nia lainatna mamawh em em zawk te chu.

*Pahnihna #2. I rilru ang an put ve loh avanga hnawlna.*

I rilru ang an put ve loh avang hian i lo hnawl ngawt a ni mai thei e. Mi an thuhmun thei lo, thenkhat an thinrim laiin thenkhat an lo hlim ve em em thei thoin i ring em? Ring e. A nih chuan i rilru ang an put loh mai avangin i hnial kher a tul lo. 

Mi dang rilru put hmang i ei loh viau chuan, i dah hniam hle tihna a ni. Mi thenkat chuan, “Ka rilru a bing mup,” an tih chuan, a nih lo vang tih ai chuan, “Chu rilru chu engvangin nge i put? Engtin nge i awm?” tia zawhnate chu a tha em em a ni. An tawngkam piah lamah, an harsatna hriatthiampui an ngai a ni.

Rilru put hmang chu a tha emaw tha lo emaw. An awm reng dawn. Tuman an rilru puthmang chu an sawifiah kher a tul lo. An mamawh chu, “Ka ngaithla che,” tih te mai hi a ni. 

Bible chuan, “Chung lam atanga finna lo chhuak erawh chu a tirin a thianghlim phawt a, chumi hnuah chuan inrem a duh a, a nunnem a, a tih nuam a, zahngaihna leh rah thain a khat a, thlei bik a nei lo va, a vervek lo a ni.” (Jakoba 3:17)

Pathian finna neiin, mi dang harsatna te chu i hriatthiampui thei ang. I thiante harsatna i ngaithlak chuan chau taka an awm pawh hahdam takin i awmtir thei ang. I kawppui lungngai taka awm pawh chu hlim takin i awmtir thei ang. Mi fing chuan mi dang rilru put dan tur an dawnpui thin.

 

Ngaihtuah zui atan

* Mi an nat laia lainatna i lantir hian anmahniah engnge nghawng a neih nia i hriat?

* Mi an tawngkam chauh ni lo an harsatna tak tak hriatthiampui turin engnge thlak danglam ngai i neih?

* Mi dang rilru hrethiam turin engtiang chiahin nge ngaihthlak hi a pawimawh?

*Vawiinah hian Isua i zui angem?*

Pathianin a thatna chu Fapa, Isua Krista kaltlangin a tilang tawh a. Bible chuan, “Pathianin khawvel a hmangaih em em a: Chutichuan a Fapa mal neihchhun a pe a, amah chu tupawh a ring apiang an boral lohva chatuana nunna an neih zawkna turin” a ti. Johana 3:16

Chatuana in nun theih nana Pathian thutiam chu ring turin i inpeih em? I inpeih a nih chuan, hetiang hian tawngtai rawh: “Ka sualnate ka puang a, ka Lalpa leh Chhandamtu atan Isua hi ka pawm e. I hnung zuia, i rawngbawl ka duh e. Ka nun tlawm tak hi ka hlan che a, i angchhunga min pawma min chhandam ve turin Isua hmingin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawh tanna atana pawimawh te a thlawnin ka lo thawn ang che.

[Lettu : Sangpuia]