MZP Hnathial-in zirtirtu sawn tur an dodal titawp lailawk!

Aizawl | June 25, 2024: Mizo Zirlai Pawl Headquarters Hnahthial chuan Gov't Hnahthial Higher Secondary School zirtirtu sawn chhuah aiawh dah lo leh Principal sawn chhuaka awmchilh theitu tur dah tura an ngenna tih hlawhtlin loh avanga Gov't Hnahthial HSS Zirtirtu leh Zirlaite School kai tur dan chu an titawp lailawk.

Gov't Hnahthial HSS School kai tur an dan chu tiam chin awm loin an ti tawp a, amaherawhchu, an thawh hona leh an nawr ten awmzia a neih loh chuan, MZP Hqrs Hnahthial chuan tun aia na zawka hma lak chhunzawm an tum a ni.

Mizo Zirlai Pawl Headquarters Hnahthial chuan thuchhuah siamin, zanin ni 25th June, 2024 khan Deputy Speaker Lalfamkima (kolasib bialtu MLA), HPC Vice Chairman V Malsawmtluanga (Lunglei North Bialtu MLA) leh 29th South Tuipui AC MLA Jeje Lalpekhlua te nen Joint Meeting neih a ni a. Gov't Hnahthial Higher Secondary School zirtirtu sawn chhuah aiawh dah lo leh Principal sawn chhuaka min awmchilh thei tu tur dah tura Mizoram Sorkar, School Education Department-a MZP Hqrs Hnahthialin a ngenna tih hlawhtlin loh avanga Gov't Hnahthial HSS Zirtirtu leh Zirlaite School kai tur dan chungchang ngaihtuah a ni a. Anni hian School kai tur kan dan chu ti tawp lai lawk a, ni 3rd July, 2024 ral hma ngei a an mahni hoa Minister hi dawr tur leh nawr ho turin min tiamin min ngen a. MZP Hqrs Hnahthial chuan sorkar lama kan hotute min ngenna leh an thu min tiam chu rin tlâkah ngaiin an chungah rinna kan nghat a ni." an ti.

MZP Hqrs Hnahthial chuan, Gov't Hnahthial HSS School kai tur kan dan chu tiam chin awm loin a ti tawp a, amaherawhchu, kan thawh hona leh kan nawrna ten awmzia a nei lo a nih chuan, MZP Hqrs Hnahthial chuan tun aia na zawkin hma a la chhunzawm dawn a ni, an ti.

MZP Hqrs Hnahthial chuan, "NGO lama kan thawhpui, MHIP Sub-Hqrs Hnahthial, MSU District Hqrs Hnahthial, MUP Sub-Hqrs Hnahthial, Hnahthial Ṭhalai Pawl leh a dangte min ṭawiawmna leh min thawhpuinaah lawmthu kan sawi tak zet zet a. Mizoram Sorkar kan dawrna te min ngaichanga, hlawhtlinna a awm loh chuan, a ai nasa zawka kan nawr pawh a min thawhpui zel turin kan sawmin kan ngen bawk a ni." tiin thuchhuah siamin an tarlang.