MZP Hnam lam intihsiakna 2024-ah 'Kawllen Cultural Club' an thiam ber!

Aizawl | June 6, 2024: MZP Hnam lam intihsiakna 2024 neih zawh takah, club ding thar 'Kawllen Cultural Club' an thiam ber!

Mizo Zirlai Pawl (MZP) General Headquarters buatsaih, GIG Motors- MZP Hnam lam intihsiakna 2024 chu vawiin tlai dar 3:00 khan Dawrpui Multipurpose Centre-ah a hmawr bawk a ni a, kawllen Cultural Club an thiam ber.

MZP Hnam Lam intihsiak 2024 ah hian Pahnihna Mizo Cultural Club, Vaivakawn niin, pathumna hi Huiva Cultural Club (Govt. Aizawl College) an ni.

Mizo Zirlai Pawl (MZP) General Headquarters buatsaih, GIG Motors- MZP Hnam lam intihsiakna hun chu vawiin ni 6 June, 2024 (Ningani) tlai dar 3 khan intihsiak kharna leh result puanna hun Dawrpui Multipurpose Hall-ah neih a ni a. He hun hi Art & Culture Minister C Lalsawivunga'n khuallian niin a hmanpui a, MZP Vice President C Lalremruata MZP Vice President-in he hun hi a kaihhruai.

Khuallian Minister C Lalsawivunga chuan, "Ram changkang leh ropui apiangin an hnam zia leh nun dan an ngaisang a. An hnam lam leh ziate an humhalh a, an chawisâng thin a ni" a ti a. "MZP-in hetiang hun an buatsaih hi lawmawm ka ti hle a, rah ṭha a chhuah ka ring a ni" a ti bawk.

Art & Culture Minister chuan, Zirlai lam thiam tak takte chu, kan hnam zia leh lamte humhalh chungin an zirlai thlahthlam lo turin a fuih a. Ruihhlo leh eirukna lak atanga fihlim zel turin a fuih bawk.

MZP President H Lalthianghlima chuan, "Mizo hmeichhia ten hnam dang neih an in tihhmuh emaw tih mai turin, hnam dang an nei sup sup a. Chung ho chu an rawn in pholang nasa em em bawk a. Kan hnam a boral loh nan, Mizo ngei nupui pasalah nei ila. Kan hnam i humhalh ang u" a ti.

GIG Motors- Hnam lam intihsiakna hi Dawrpui Multipurpose Hall-ah, June 5 - 6 chhung khanin neih niin, Cheraw (Buhza-aih) leh Solakia/ Sawlakia hmangin intihsiakna hi neih a ni a. Cultural club 12 an tel a. Lawmman an lak dan chu hetiang hi a ni:

1na -Kawllen Cultural Club

2na- Mizo Cultural Club, Vaivakawn

3na- Huiva Cultural Club, Govt. Aizawl College.

Lawmman hi, 1 na hian pawisa fai cheng Sing sarih(70,000), Trophy leh Thuchei an dawng a, lawmman 2-na hian cheng sing nga (50,000), Trophy leh Thuchei an dawng a, Lawmman 3-na hian cheng sing thum (30000), Trophy leh Thuziak an dawng bawk. Cultural Club tel zawng zawngte hian participation prize cheng sangthum (3000) theuh an dawng.

He hunah hian Dr. Lalmalsawma Nghaka, CEO D3 Business Enterprise chuan thu an sawi bawk.

MZP chuan Hnam lam intihsiakna hi hun rei tak atangin alo buatsaih tawh thin a, kan hnam zia leh nunphung te kan vawn nun leh kan chawisang hi, kan chhawm nun zel theih nan, MZP chuan hnam lam intihsiakna a buatsaih thin a ni. Cheraw (Buhza-aih) leh Solakia/Sawlakia lam hmanga inelna hi neih a ni.

Intihsiakna ah hian Cultural club 12; Mizo Cultural Club Vaivakawn, West Lungdar Cultural Club, New Diakkawn Cultural Club Kolasib, Mizo Cultural & Drama club Republic Veng, Huiva Cultural Club (Govt. Aizawl College), Kawllen Cultural Club, Kumtluang Cultural Club (Govt. J Thankima College), Chhawkhlei Cultural Club (Pachhunga University College), Home Mission School Bawngkawn Branch, Dingdi Cultural Club Dinthar, Reiek Branch YMA, St. Pauls Higher Secondary School te an tel.

Kawllen Cultural Club hi hnam lam tui leh thiam, ṭhianho intelkhawm an ni a. Kumin kumtir a din a ni. College hrang hrang chhuak an intel khwm a, an college chhuahna ṭheuh-ah Cultural club a lo inhmang hrep tawhte an ni a. An thiam hle a ni.