Mizoram State 10 Ball Pool Ranking Tournament 2024 Final-ah Zonuntluanga leh K Lallawmkima inhmachhawn dawn!

Mizoram State 10 Ball Pool Ranking Tournament 2024 Final-ah Zonuntluanga leh K Lallawmkima te inhmachhawn dawn!

K Lallawmkima, Khatla South | Zonuntluanga, Electric Veng

Aizawl | June 28, 2024: Mizoram Snooker & Billiards Association (MSBA) buatsaih Mizoram State 10 Ball Pool Ranking Tournament 2024 chu zanin khan Semi Finals khelh zawh niin, nakzan hian final khelh a ni dawn.

Final-ah hian Aizawl Electric Veng tlangval Zonuntluanga leh Khatla South tlangval K Lallawmkima te an inhmachhawn dawn a. Mizoram State 10 Ball Pool Ranking 2024 final naktuk June 29 tlai dar 5 hian khelh a ni dawn a, race to 10-a khelh tur a ni.

Mizoram State 10 Ball Pool Ranking Tournament 2024 Semi finals hi race to 8 (frame 8 la hmasa sa chak) a khelh niin, player tha rual a insu a, a hmuhnawm mep mep hle.

Semi final match hmasa zawkah Lalchhandama, Dinthar leh Zonuntluanga, Electric veng ten inkhel hmuhnawm tak min hlui a, a tawpah Zonuntluanga player tawnhriat ngah a nih zia langin 8 - 6 in hnehna a chang ta a ni.

Semi final match hnuhnung zawkah hian R Lalthazuala, Chaltlang vs K Lallawmkima, Khatla South te inkhel kan hmu a, hei pawh hi a hmuhnawmin a pui hle a. K Lallawmkima chuan 8 - 4 in R Lalthazuala a hneh a, final a inhlangkai a ni.

MSBA buatsaih Mizoram State 10 Ball Pool Ranking 2024 hi MSBA Hall, Hawla Indoor Stadium, Republic Vengthlang-ah khelh a ni a. Mizoram hmun hrang hrang atangin player 40 chuang an fuankhawm a. Mizoram State 10 Ball Pool Ranking 2024 hi naktuk June 29 tlai dar 5 hian a hmawr bawk a ni dawn ta a ni.

Pool khel duhte tan, Pathianni tih loh nitin chawhnu dar 2 atanga zan dar 10 chhungin cheng 50 lek chawiin MSBA Hall-ah hian a khelh reng theih a ni.

Mizoram State 10 Ball Pool Ranking Tournament 2024

Semi Final - June 28, 2024 Result

7:00 PM: Lalchhandama 6 - 8 Zonuntluanga

8:30 PM: R Lalthazuala 4 - 8 K Lallawmkima

Mizoram State 10 Ball Pool Ranking Tournament 2024

Final - June 29, 2024 Fixture

5:00 PM: Zonuntluanga vs K Lallawmkima

An match history tlem a zawng:

K Lallawmkima hi March 29 - April 2, 2022 chhunga buatsaih Mizoram State 6 Red Snooker Championship 2021-22 khan champion a lo ni tawh a. May 20 - 25 chhunga neih zawh tak Mizoram State 9 Ball Pool Ranking Tournament 2024-ah K Lallawmkima hi semi finalist a ni.

Electric Veng Zonuntluanga hi Mizoram Snooker Championship 2018 Champion leh Mizoram Snooker Ranking Championship 2019 champion alo ni tawh a. Jan 23 - 27, 2024 chhunga 'Mizoram State 6 Red Snooker Ranking Tournament 2024' neih-ah pahnihna a ni a. Mizoram State Games 2019-ah khan Pool 8 Ball-ah champion a lo ni tawh bawk a ni.