Mizoram State 10 Ball Pool Ranking Tournament 2024 a hmawr bawk ta; K Lallawmkima a champion

Mizoram State 10 Ball Pool Ranking Tournament 2024 a hmawr bawk a ni ta; K Lallawmkima a champion

Champion - K Lallawmkima

Aizawl | June 29, 2024: Mizoram Snooker & Billiards Association (MSBA) buatsaih Mizoram State 10 Ball Pool Ranking Tournament 2024 chu zanin khan final khelin a hmawr bawk a ni ta a, K Lallawmkima, Khatla South a champion.

Mizoram State 10 Ball Pool Ranking 2024 final hi vawiin June 29 tlai dar 5 atang khan khelh tan niin, race to 10 (frame 10 la hmasa zawk zawk chak)-a khelh a ni.

K Lallawmkima, Khatla South | Zonuntluanga, Electric Veng

Final-ah hian Aizawl Electric Veng tlangval Zonuntluanga leh Khatla South tlangval K Lallawmkima te an inhmachhawn a. Player tha leh fei ve ve insu an ni bawk a, an game a sangin a hmuhnawm mep mep hle.

Darkar hnih chuang zet an khelh hnuah K Lallawmkima'n 10 - 6 in hnehna a chang a, Mizoram State 10 Ball Pool Ranking Tournament 2024 Champion a ni ta a ni.

Final match khelh zawh hian lawmman sem nghal a ni a, Finalist te bakah hian Semi finalist Lalchhandama leh R Lalthazuala te hnenah lawmman hlan a ni.

Finalist te hian, lawmman atan medal leh certificate bakah pawisa fai an dawng a ni.

MSBA buatsaih Mizoram State 10 Ball Pool Ranking 2024 hi June 24 atang khan MSBA Hall, Hawla Indoor Stadium, Republic Vengthlang-ah khelh a ni a. Mizoram hmun hrang hrang atangin player 40 chuang an fuankhawm a. Mizoram State 10 Ball Pool Ranking 2024 hi zanin June 29 khan a hmawr bawk a ni ta a ni.

Pool hi a tui leh khel duhte tan, Pathianni tih loh nitin chawhnu dar 2 atanga zan dar 10 chhungin cheng 50 lek chawiin MSBA Hall-ah hian a khelh reng theih a ni.

Mizoram State 10 Ball Pool Ranking Tournament 2024

Semi Final - June 28, 2024 Result

7:00 PM: Lalchhandama 6 - 8 Zonuntluanga

8:30 PM: R Lalthazuala 4 - 8 K Lallawmkima

Mizoram State 10 Ball Pool Ranking Tournament 2024

Final - June 29, 2024 result

5:00 PM: Zonuntluanga vs K Lallawmkima

An match history tlem a zawng:

K Lallawmkima hi March 29 - April 2, 2022 chhunga buatsaih Mizoram State 6 Red Snooker Championship 2021-22 khan champion a lo ni tawh a. May 20 - 25 chhunga neih zawh tak Mizoram State 9 Ball Pool Ranking Tournament 2024-ah K Lallawmkima hi semi finalist a ni.

Electric Veng Zonuntluanga hi Mizoram Snooker Championship 2018 Champion leh Mizoram Snooker Ranking Championship 2019 champion alo ni tawh a. Jan 23 - 27, 2024 chhunga 'Mizoram State 6 Red Snooker Ranking Tournament 2024' neih-ah pahnihna a ni a. Mizoram State Games 2019-ah khan Pool 8 Ball-ah champion a lo ni tawh bawk a ni.