I HNA LEH I HUN HLUTNA HI HRIATPAWLH SUH

_Hun Rei Daih Thil Ngaihlu Tura Nun Buatsaih_

By Rick Warren 

— June 18, 2024

“Thawhrimna zawng zawng leh themthiamna tinrengte hi thenawm elrelna avânga lo awm a ni tih ka hre ta. Hei pawh hi engmah lo leh thil lothlawn mai a ni.” Thuhriltu 4:4

I hnathawh hahnaah hian chhuanlam ṭha tak i nei maithei e. A chang chuan chhungkaw chawmna tur vang a ni e pawh i ti ṭhin ang. A chang chuan kan hna hi a pawimawh em avangin han ngaihthah deuh pawh kan hreh ṭhin a ni.

A chang chuan hlutna kan tehna pawh hi a buaithlak ṭhin. Thil diklo zawk hi kan ngaihlu mai ṭhin a. Thil dang zawng aiin thil neih rei rui kan duh zawk ṭhin.

Bible chuan, “Thawhrimna zawng zawng leh themthiamna tinrengte hi thenawm elrelna avânga lo awm a ni tih ka hre ta. Hei pawh hi engmah lo leh thil lothlawn mai a ni.” (Thuhriltu 4:4).

Pathianin duhthlan tur pahnih min pe: Kan hna zawng zawngah hun ka seng vek thei a, a nih loh vek pawhin kan                    chhungkua leh ṭhenawm khawveng tan hun kan insiam chang a awmthei bawk. Nimahsela, a pahnih hian kan ti ve ve theilo thung.

Chuvangin kan hlutna hi engnge ni tih zawhna a lo piang ta a ni. Thil neih rui nge i duh a, rilru hahna te tihkian a i chhungte leh i ṭhiante bula hun tam zawk insiam i duh? Duhthlanna chu i kutah a awm e.

Isuan hetiang hian a sawi: “Miin khawvel hi a pumin nei sela, a nun chan si sela, a tan engnge sawt ang?” (Marka 8:36).jj “Company president nihna nei la i kawppui emaw fate emaw chan vek si la i duh ang em?”

A chhanna chu hei hi? A ṭha lo hul hual a ni.

I hna leh i hlutna chu thil pahnih hrang daih a ni. Hlutna engmah i nei lo tiin an hrilh che a, chu chu a dik lohzia tilang turin hna i thawk mek pawh a ni thei e. I rilruin a dik lohzia hi ka hmuhtir dawn i ti pawh a ni maithei e. Chuvang chuan hna i thawk ngat ngat a, nimahsela eng ang pawhin thawk nasa mah la tawk chin a awm thei lo vang. Chawlh hahdam deuh i duh pawhin, aw chuan zawitein, thawk zel rawh a rawn ti zel ang. Chu aw chu i haider a ngai ang. Dawt a ni thei a ni.

Pastor ka ni a, mi an hnuk chat tur hi ka hmu ve fo ṭhin. A chang chuan damdawiinah, an chenna inah leh an chetsualna hmunah te pawh a ni ṭhin. Chung hnukchat mai tur ka hmuhho te chuan, "ka hnathawhna hmunah khan hun tam zawk awm ka va chak em" tih an sawi reng reng ka hre lo.

Tuman an sawi lo tlat.

Chuvang chuan tun hun hi i hlutna i ngaihtuah ṭhat hun a ni dawn lawm ni? Chuvangin intlansiakna fuh lo tak chu tawpsan rawh. 

Ngaihtuah zui atan

* I thawh rim luat avang hian in chhungkuaah nghawng engnge a neih? I hriselna em ni? Nge Pathian nena in inlaichinna zawk?

* I thawh nasat lutuk avanga i buai a nih chuan, engnge a chhan lian ber ni ta ang?

* Engtin nge i hna leh i hlutna i intluk tlang deuha i siamrem theih ang?

*Krista Isuaa Pathian chhandamna thutiam chu i ring thei ang em?*

 

Isua hnenah i nun i hlan duh a nih chuan he ṭawngṭaina hi hlan ang che:

 

“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.

 

“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamtu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”

 

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zin kawng atana thuziak pawimawh tak tak lo thawn che nia.

*[Lettu: Sangpuia]*