Black belt chawimawina sang Master VLSawma leh Master Joseph Thansanga hnenah hlan an ni

Taekwondo Federation of India(TFI)  chuan Taekwondo Poomsae-ah hma a sawn theihna turin Kukkiwon, World Taekwondo Hqrs. atangin Grand Master te a chah nise a ti a. Seminar pekna hmun atan  India rama Poomsae thiamna area thlan a ni a, North East lamah Mizoram leh South/central India lamah Karnataka an thlan a ni bawk a. A hun tura ruat hi July a ni a, mahse Mizoram Sports Conclave hman hman tura Taekwondo Seminar buatsaih tura Mizoram sawrkar ngenna angin  TFI leh World Taekwondo Hqrs chuan rem a ti a.

Mizorama lokal Grand Master Hee Do Kim hi Kukkiwon Professor niin World Champion vawi 3 lo ni tawh a ni a. Taekwondo headquarter-ah nihna pawimawh tak tak chelh mektu a niin 9th Dan Black belt a ni. Grand Master Lee Jae Ku hi International Taekwondo Poomsae leh Kyorugi coaching Expert a ni.  India Team vawi tam tak lo hrual tawh leh medal engmawzat lo lakpui tawhtu a ni a, 8th Dan Black belt a ni bawk.

Kukkiwon hian mi bik te hnenah chawimawina a pe thin a. Chawimawina hi chi 2 in an then a. Ram pum huap-a Taekwondo promote tha leh tihmasawntu/hmalatu Technical mi (Black belt) hnenah chawimawina sang ber Letter of Commendation an pe thin a. Technical mi ni lo - Mihring dikna chanvo humhalh tha te, Environment leh mipui tana hna thawktha ram hruaitute leh Infiamnaah (Taekwondo) hmasawn tak ram hruaitu te hnenah Honorary Black belt leh Letter of appreciation  an pe thin bawk. 

Grand Master te hian kan Chief Minister zahawm tak Pu Lalduhoma hnena Letter of Appreciation leh Honorary Black belt 7th Dan an hlan a. Letter of Appreciation hi Pu Lalfak Zuala IAS(Retd) hnenah kum 2022 khan hlan a ni tawh bawk. An pek chhan hi Mizoram-ah Taekwondo in nasa taka hma a sawn vang te, Khawvel huap inelnaah Mizo player te chet that vang te leh Sawrkar leh MATA thawhhona tha tak a awm vanga a niin Ram hruaitu lu ber a nih angn a hnenah an hlan a ni a. Tin, Sports & Taekwondo ti hmasawn zel tura a laka beiseina an neih vang a ni bawk. Letter of Commendation hi Pu Zothanpuia(2002), Pu Joseph Thansanga(2012) Pu VLSawma(2012) te hnenah hlan an ni tawh bawk.

Honorary Black belt hi kum 2012 January ni 19 khan kha tih laia Chief Minister Pu Lal Thanhawla hnenah Kukkiwon aiawhin Master Lee Jeong Hee, General Sports Manager, Korean Embassy to India in a lo hlan tawh a. Humanitarian leh Khawvel Kohhran lian ber hotupa Pope Francis hnenah te, Ram hruaitu ropui Barak Obama leh Donald Trump te, UN Secretary General Ban Ki-Moon te, Taekwondo Ambassador atana an hman Film star Shah Rukh Khan leh midang tam tak an pe bawk a ni.

Mizoram Sports Conclave tel tur leh National Taekwondo Seminar zirtir tura lokal, Grand Master Prof.Hee Do Kim leh Grand Master Lee Jae Ku te chuan Mizo te leh India mipui te hian Olympic player tam zawk medal lak theihna chance in nei a. sawrkar, player, Finance backup a awm that chuan  India hian Khawvel in awp thei a ni a ni an ti.  

Mizo te hi India ramah Taekwondo Thiam ber zinga mi an ni a. Sawrkar leh Company support na tha an mamawh a. Chanchinbu miten in backup zel hi an chakna a ni bawk a ti.

Mizoram Amateur Taekwondo association (MATA) press meet hi MATA President Prof.Rualkhuma Colney in a kaihruai a, MATA Gen.Secretary Master Joseph Thansanga, MATA hmalakna leh Honorary Black belt chung chang sawifiahin Grand Master ten an lokal chhan te an sawi a. Master VL Sawman lawmthu sawina hun a hmang bawk. Press meet hi MATA OB dangten an tawiawm tha hle.

Grand Master te hian MATA hnathawh that avangin chawimawina heng mit hnenah hian a hlan nghal a.

MATA President Prof.Rualkhuma Colney hnenah Honorary Black Belt an hlan a.

World Taekwondo Headquarter Kukkiwon Technical (Black belt) chawimawina sang ber Master VLSawma leh Master Joseph Thansanga hnenah an hlan nghal bawk.