Aizawl | May 22, 2024: Vawiin khan nilengin Aizawl Mayor Pu Lalrinenga Sailo hovin AMC Corporator te leh Officer leh staff te chuan Save The Riparian nena tanghovin Tuikual Lui thian faiin an hnatlang.
He hnatlangah hian mi 150 chuang thawk chhuakin Tuikual Lui hnar, Khatla Veng Field thlang kawr atangin bawlhhlawh chi hrang hrang - plastic bottle, sarang, burchhia, pawnchhia leh a dangte an thiar chhuak a, AMC motor hmangin bawlhhlawhte hi Solid Waste Management Center, Tuirial-ah an paih nghal a ni.
He hnatlang hawnna hun hi Pu Romalsawma (Roma Hmar), Save The Riparian in a kaihruai a. Pu Lalrinenga Sailo, Aizawl Mayor-in thu sawiin Save The Riparian te hmalakna chhuanawm a tih thu a sawi a. AMC in Aizawl khawpui faina kawngah theihtawp a chhuah mek tih sawiin nasa leh zualin hma a lak chhunzawm zel tur thu a chah bawk a ni.
He hnatlangah hian Aizawl Mayor bakah hian Pu R. Thanglura, Dy. Mayor; Executive Corporators te; Corporators te; Er. Lalhriatpuia, Municipal Commissioner leh AMC Office-a thawktute leh Save The Riparian hruaitute leh member te an thawk chhuak a. Hnatlanga thawk chhuak ten faina kawnga tha an thawh thei chu lawmawm an ti hle a ni.
AMC chuan a hmun lova bawlhhlawh paihin kan chenna leilung a tihchhiat mek thu leh nungchate tan thihna a thlen nasat thin avangin bawlhhlawh paihna hmun a siamah chauh bawlhhlawh paih thin turin mipuite a ngen a. Veng tinah bawlhhlawh khawn thin a ni a, hengah te chauh hian kan bawlhhlawh te tha taka thliara paih thin turin Aizawl mipuite a ngen a. Faina leh thianghlimna kawngah hma sawn kan tum avangin loh theih lohin dan leh inkaihhruaina zawmlote chungah hma a la zel dawn a ni tih Aizawl mipuite hriattirin a ngen a ni.
Heng bakah hian AMC chuan tun hnaiah Silaimual piaha kawngpui dunga bawlhhlawh tam tak lo chhek hnawk te thianfaiin a mawhphurtu a chhui mek a. Aizawl mipui tam zawkten faina kawngah rilru dik tak kan pu chho mek chu a lawmawm rualin mi tlemte avanga kan khawpui hmai a lo lang bal thin hi a AMC chuan pawi a ti hle a. AMC chuan Kohhran leh tlawmngai pawl te leh Aizawl mipuite kan khawpui tihfaina kawnga thawkchhuak zel turin a sawm a ni.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: