THLARAU THILPEK HMAN DAN KAWNG LI

_Thil Tidanglam Tura Hrual_

-  Rick Warren 

-  May 22, 2024

“Mitthi zing ata nung leh angin Pathian hnenah inpe ula, in taksa pengte pawh chu felna hriamhrei atan Pathian hnenah pe phal zawk rawh u.” (Rom 6:13)

Pathian chuan Isua zuitu tawh phawt chu thlarau thilpek a pe vek a. Pathianin nangmaha thlarau thilpek a dah chu engtin nge i hman ve le? Thlarau thilpek hman dan kawng li i lo en teh ang:

*1. Thlarau thilpek i dawn chu haichhuak rawh.*

I hman hma daihin thilpek i dawn chu a awm tawh tih hria ang che. Thudik chu haider tawh lo la, Pathianin nangmaha a dah chu haichhuah tum zawk ang che. Bible chuan 1 Timothea 4:14 ah chuan, “Nangmaha awm thilpek, hrilh lawk anga upahote kut nghata Pathianin a neihtir che kha thlahthlam suh,” min ti a ni.

*2. I thilpek chu Pathian hnenah hlan rawh.*

Bible chuan  Rom 6:13 ah, “Mitthi zing ata nung leh angin Pathian hnenah inpe ula, in taksa pengte pawh chu felna hriamhrei atan Pathian hnenah pe phal zawk rawh u,” min ti a ni. I theihna chu i hriaa, i la hmang chhuak lo a ni maithei e. Nangma tan i lo hmang pawh a ni thei e. Pathian hmaah inngaitlawm la, thilthlawnpek i dawn zawng zawng chu Pathian hnenah hlan rawh. I chhuanlam zawng zawng dahthain, “Lalpa, thilpek ka dawn zawng zawngte i hnenah ka hlan let a che,” ti ang che. 

*3. I thilpek chu tipung rawh.*

Thilpek te hi thahrui ang a ni. I hman tam poh leh, i dawng tam ang. Pathianin a pek che chu ti thangin i pei pung thei a ni. Pathian hnen atanga thilpek kan dawn reng reng hi chu tihpun zel tur a ni. I thilpek dawn ang dawng ve mi dang hnen atanga i zir theih chuan hma i sawn lehzual ang.

Pathianin thilthlawnpek a pek che chu i hman that chuan - talent tam zawk, sum leh pai, mi hneh theihna, inlaichinna leh mawhphurhna thlengin a pek belh ang che tih ka hria a ni. Pathian chuan, “Ani hi rintlak a ni, ka pek belhchhah zel dawn,” a ti a ni.  

*4. Thlarau thilpek chu hmang rawh.*

Hmang tih awmzia chu rawngbawlna atana hmang tihna a ni. Fehchhuak meuhva, rawngbawl hna thawh te pawh a ni ang chu. Rom 12:6 ah chuan, “Khawngaihna min pek angzia zelin thilthlawnpek hrang hrang kan nei theuh va, thu hrilh tur a nih chuan kan rin tawk ang zelin i hril ang u.”

Thlarau thilpek chu - haichhuah, hlan, tihpun leh hman dan tha ber eng nge ni ang le? Pawl te (small group) ah a nih chuan, rinna fiahna tha tak a ni ang. Pawl te (small group) ang hi i nei lo a nih chuan tunkar chhung hian zawm tur dap la, chutah chuan i thlarau thilpek chu him takin, tangkai zawkin i thiante puihnain i hmang thei ang tih ka ring tlat a ni. 

Ngaihtuah zui atan

* I thilthlawnpek dawn eng hi nge Pathian hnena hlan loh i neih? A hnena hlan chu engang hi nge ni ngai le?

* Tunkar chhung hian thlarau thilpek i dawn pakhat chu engtin nge i tihpun ang le?

*  I thilpek dawn chu engtiklai khan nge i lo peipun tawh le? Tunah hian eng thlarau thilpek i dawn kha nge hmanchhuah ngai le? 

*Pathian thilthlawnpek dawng turin i inpeih em?*

Pathianin ngaihdamna leh chhandamna a thlawnin min pe a. Chu a thilpek chu i dawn phawt chuan amah leh mi dangte rawng i bawl theih nan thlarau thilpek a pe ang che. Chung thilpekte chu dawng tura i inpeih chuan heti hian ṭawngṭai rawh le:

"Lalpa, thil ka lo tihsual tawh zawng zawng min ngaihdam avangin ka lawm e. Ka duhnaah ka kal a, mahse tunah chuan i khawngaihnaah ka rinna ka nghat e. Ka sualte min ngaidam turin ka ngen a che.

Vawiin hian Isua Krista ka tana a inpekna zara chatuan nunna a thlawna min pek chu ka pawm e. Vanram hi ka hlawh chhuak thei hauh lo tih ka hria. He Thlarau thilthlawnpek hi ka pawm e. Ka nunah lo cheng la, i hmangaihna, hlimna, muanna leh dawhtheihnain min vur ang che.

Lalpa, ka nuna thil bîk, thlarau lama theihna min pek hi ka pawm e. Hmuchhuak a, i tana hmang a, puntir a, min siam anga nung turin min pui ang che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

*[Lettu: Sangpuia]*