Supply Minister-in oil supply khaihlak vang hian mipui chiai lo turin chah

Aizawl | May 10, 2024: Vawiin May ni 10 , 2024 khan FCS & CA Minister Pu B. Lalchhanzova hovin department hotute leh thuneitu hrang hrang te tunlai rail kawng a chhiat vanga petrol/diesel duh anga tam a thlen loh vanga harsatna awm te an sawi ho. He meeting-ah hian Pi Zodingpuii, Secretary FCS & CA chuan Assam-a rail kawng chhiat vangin Monirbond-a Oil depot-ah rail hmanga oil lakluh a theih loh chuan tuialhthei supply kawngah Mizoram a nghawng thu a sawi a. Amaherawhchu rail-a tuialhthei lakluh hi Indian Oil Corporation Limited te chauh an ni a, Company dang Bharat Petroleum leh Hindustan Petroleum te chuan kawng pangngaiah tuialhthei hi an rawn phurh luh reng thu a report a ni.

FCS&CA Minister chuan IOCL oil supply a khaihlak vang hian mipuite chiai lo tura chahin, a hun pangngai angin petrol rawn lut hi tam tawk rihlo mahse tuialhthei te hi a rawn thleng reng tho va, mipuiten an hman khawp aia tam la lo tur leh chheprelh lo turin a ngen a ni. Tuialhthei chu ualau taka a black-a zuar an awm chu a veiawm thu meeting-na ah chuan sawi chhuah a ni bawk a. Hemi kawnga hma la turin DC kaihhruaina hnuaiah Police leh FCS & CA mi leh sa ten Aizawl petrol pump leh hmun hrang hrangah endikna an nei dawn. District danga DC te pawh a ṭul anga hma la ṭheuh tura hriattir an ni bawk.

Tuialhthei indaihlohna hi hman chawp aia tam chhek khawl leh black a zuarten an lakkhawm vanga thleng niin hei hian indaihlohna siamchawp 'artificial shortage' a thlen thu sawiin FCS&CA Minister Pu B. Lalchhanzova chuan mipuite mahni hman khawp aia tam la lo tur leh leh black-a zuarte pawh ti tawp turin a chah a ni. Mizoram sawrkar chuan hemi kawngah hian chak takin hma a lak mek reng thu sawiin amah pawhin IOCL hotute a biak fo thu leh Chief Minister pawn Railway leh IOCL hotute chu DO letter hmanga rail kawng siam tichak tur leh siam zawh a nih hmaa tuialhthei tam zawk Mizorama lak luh a nih theih nan Tanker hmanga Guwahati atanga phurh luh sak tura a ngen thu a sawi bawk a. A theih ang angin Mizoram-a oil lo luh dan puanzar a nih tur thu sawiin media lam pawh mipuite oil dinhmun puanzar kawngah thawhpui atan a sawm bawk.