NGOCC-in Mizorama Rel kawng siam thar tur chungchang sawihona buatsaih

Aizawl | May 10, 2024: NGO Coordination Committee in Mizorama Rel kawng siam thar tur chungchang sawihona hun a buatsaih.

Vawiin ni 10.05.2024(Zirtawpni) chhun dar 12:00 ah khan Central YMA Committee Room ah NGO Coordination Committee buatsaihin Mizorama Rel kawng chungchang sawihona hun hman a ni a. He hun hi Pu Lalhmachhuana, Chairman, NGOCC ( President, CYMA ni bawk) in a kaihruai.

Prof. Malsawmliana, Secretary, NGOCC in Rel kawng chungchanga NGOCC in thu a lo dah tawh dan leh sawihona hun buatsaih a nih chhan te a sawi fiah a. Kalkhawm te inhmelhriattirna hun a hmang nghal bawk.

Pu Hrangtawna, IRTS( Rtd), Consultant ( Railways) in Sihhmui - Hmawngbuchhuah Rel kawng siam dan tura ruahmanna (project) leh hmalak chhoh dan tur te sawifiahna hun a hmang.

Mizoramah chhungah Bairabi atanga Sihhmui thleng Rel kawng siam mek a nih bakah tunah hian Sihhmui atanga Hmawngbuchhuah thleng Rel kawng Km 223 a thui siam turin ruahmanna siam leh mek a ni a. Hemi chungchangah hian NGO hrang hrang leh Political Party ten ngaihdan sawiin Mizoram laili a Rel kawng kal turin nghawng a neih dan tur te sawiho a ni. Sawihona atang hian NGOCC in ngaihdan a la siam leh dawn a, pawl leh mimal rawn tur awm te an la rawn leh anga, chumi hnuah Rel kawng chungchanga Mipui ngaihdan chu Mizoram Sawrkarah NGOCC in a theh lut dawn a ni.

Inkawmhonaah hian NGO Coordination Committee a tel pawl hrang hrang - CYMA, MUP, MHIP, MZP, MSU bakah Political Party hrang hrang - BJP, MPCC, PC,ZPM, ZNP aiawhte an tel a. NGO pawl dang- Mizoram Environmental NGO Coordination Committee, Centre for Environment & Social Justice (CESJ) leh Mizoram Merchant Association (MIMA) te an tel a, mimala tel tura sawm te an tel bawk.

Anni bakah hian Sawrkar Department- Police, Revenue, Home leh Aizawl DC atangin Rel kawng chungchanga an Department kaihhnawih leh hmalak dan te an sawi bawk.