MZP Lungleiin Govt Tlabung PS II office sak an endik

Aizawl | May 10, 2024: MZP Hqrs: Lunglei leh MZP Sub-Hqrs: Tlabung te chuan vawiin Ni 10.05.2024(Zirtawp Ni) khan Govt’ Tlabung P/S-II Office building sak chu an endik.

Office building sa tu te hian an hna hi an namnul hle mai a, a bang atana thingphek hman te chu nawh mam miahloh te, a tukverh atana thing phek hman te pawh kalh theihloh khawpa chhia a an siam chu MZP Hqrs: Lunglei chuan mak a ti hle a.

Veranda kalka bera hman tur atana hnathawktu te’n chartin pahnih chauh hmanga an siam sak zirtirtute thahnem ngaihna a an mahni pawisa hmanga siam that leh ngai te chu zahthlak an ti hle a ni.

Tukverh kamna atana thing bung an hmang mai te, rawng hnawih pawh coat nawn awm miahlo te leh electric wiring engmah khawih lova a hnathawktu te’n an in sa seng san te chu MZP Hqrs: Lunglei chuan hriatthiam har a ti hle a ni.

Govt’ P/S -II Tlabung hi Tlabung khua a P/S pali awm zinga Mizo naupang kal tamna ber niin, Tlabung P/S ah chuan a pawimawh ber pawl a tih theih hial a ni. Hetiang anih laia School office building sak thar chhe lutuk te, school main building chhe lutuk avanga pawl hnih leh pawl thum zirlai te room khata khung an ngai te chu MZP Hqrs: Lunglei chuan pawi a ti hle a. Blackboard hmantlak mumal awmlo te celing chhiat lutuk avanga ruahsur changa class lak theih miahloh te chu pawi a ti hle a ni.

MZP Hqrs: Lunglei chuan thuneitu chu a rang thei ang bera Govt’ P/S -II Tlabung office building sak chhe lutuk chu enfiah a a tul anga hma la turin a ngen a. Zirlai naupang sawmli leh pahnih awmna school a zirtirtu pathum chiah an awm chu MZP Hqrs: Lunglei leh MZP Sub-Hqrs: Tlabung te chuan hriatthiam har an ti hle a, thuneitu te’n a rang thei ang bera hma la turin a ngen nghal bawk a ni.