MSU-in Corporate Social Responsibility (CSR) leh Student Education Loan chungchangah inrawnkhawmna buatsaih

Aizawl | May 10, 2024: Mizo Students’ Union: General Headquarters, Aizawl chuan vawiin ni 10 May, 2024 chawhma dar 11:00 khan Mizoram chhunga Bank hrang hrangte nen Corporate Social Responsibility (CSR) leh Student Education Loan chungchanga inrawnkhawmna I&PR Auditorium ah an nei. He hun hi Pu Laldinsanga Vice President chuan a kaihruai a, Pu TBC Lalvenchhunga, MLA, Adviser to Chief Minister (Finance) chu Keynote Speaker a ni.

Pu TBC Lalvenchhunga chuan CSR leh Education Loan chungchangah sawi zauna neiin, Bank hrang hrang kal khawm te chu zirlaite leh Mizoram chhung mipuite tan, CSR fund hmanga tangkai leh zuala ke pen zel turin a chah bawk a ni.

He huna bank hrang hrang kal khawm te chuan CSR kaltlanga mipuite tana an tih theih awmah chuan an tlan chhiat loh thu leh theihtawpa ke an pen thin thu an sawi. Eduction loan chungchangah zirlaite atangin document thil tel tur duh khawp a awm thin loh avangin an duh angin an pe chhuak hlei thei lo thin a, zirlaite atanga education loan dil an tam tawk loh thu an sawi bawk. Bank kal khawm te chuan education loan pek chhuahna kawngah zirlaiten harsatna an tawh loh nan tanpui an inhuam thu an sawi a ni.

MSU President Pu Samuel Zoramthanpuia chuan bank kal khawmte chu zirlaite leh Mizoram tana ke pen puiah a sawm a, Consultation Meeting chuan zirlaite tan rah tha tak a chhuah tur thu a sawi bawk.