Aizawl | May 23, 2024: Mizo Zirlai Pawl (MZP) General Headquarters, Aizawl chuan vawiin May ni 23, 2024 chhun dar 12:00 khan Vanapa Hall-ah High School Leaving Certificate (HSLC) Examination 2024 Top 10-a Mizo tlingte chawimawina hun a buatsaih a, Prof. Lalnilawma, Minister of State chuan Khuallian niin a hmanpui.
MZP President Pu H. Lalthianghlima chuan thu sawiin, Kumin HSLC Exam Result-ah hian 70% aia tam kan passed a, a lawmawm em em rualin hei aia sang hi kan pass thei a ni, ṭan i la zel ang u, tiin zirlaite a fuih a.
"MZP chuan Mizo zirlaite inkarah inelna thianghlim awm se, ṭang deuh deuh ila. Hnam dang zirlaite el phak ila kan duh avangin hetiang hun hi buatsaih ṭhin kan ni a, kumin Top-10 ah Mizo zirlai deuh vek kan awm hi lawmawm kan ti hle a ni."
MZP President chuan, "Mizo hmeichhia chhuanawm tak tak an awm rualin, Mizo hnam ti mualpho hi an awm leh zeuh thin hi a pawi em em a. Mizo hmeichhia hnamdang pasal neite hian Mizo hnam an ti mualpho thin a, ṭan kan lak a ngai ani" a ti a. "Sairang thlengin rel a lo luh dawn avangin, Mizo thalaite eng hna pawh thawk thei turin kan lo inbuatsaih a ngai a ni" a ti bawk.
Khuallian Prof. Lalnilawma chuan thu sawiin, HSLC Top-10 a tling Mizo zirlaite chu lawmpuina leh duhsakna a hlan a. Chutih rualin an bul tanna a nih avangin, an hmabak a la tam a. Hlawhtling zel turin theihtawp chhuah turin a fuih.
Khuallian chuan, Khawvel hun hman chhoh zelna turah hlawhtlinna chauh ni lo, hlawhchhanna te pawh zir a ngai a. Zirlai hlawhtling rihlo te pawh beidawng lo turin a fuih. Pu Nitea chuan, "Kan thiamna leh finnate, kan hlawhtlinna te hi mahni tan chauh ni lo, kan ram leh hnam leh khawtlang tan i hmang ang u. Kan zir zelna kawngh; khawi hmunah pawh awm ila, Mizo identity– tlawmngaihna leh huaisenna, midang tana inpekna i vawng nung zel ang u a ti bawk.
Vawiin-a HSLC 2024 Top 10-a Mizo tling chawimawite hi mipa 5 leh Hmeichhia 8 an ni.
Zirlaite hi chawimawina thuziak, tangkafai cheng sang nga (5,000), Lalhmachhuana Zofa lehkhabu ziah 'Mizo Lui Hmingthangte', tih leh Mizoram General Knowledge English Edition leh Lalhruaitluanga ziah Zirna Lamtluang Lehkhabute hlan an ni.
He hun hi MZP General Headquarters Vice President Pu Lalremruata'n a kaihruai a, Central Kristian Thalai Pawl (Central KTP) Leader Rev. Dr. Rosiamliana Tochhawng in hunserh a hmang a, GIG Motors CEO John Lalpeka'n thu a sawi bawk.
Kan chawimawi te:-
1. Lalmoipuia Lawmzual - a pa HL Lawmzuala
*St. Paul's HSS*
2. Vanlalmuanpuii - a pa R. lalthazuala
*St. Paul's HSS*
3. H.Lalsangpuia - a pa H. Lalhumhima
*St. Joseph HSS*
4. Lalramluahpuii - a pa C. Lalduhawma
*St. Joseph HSS*
5. Vanlalenkawli - a pa C. Laltlansanga
*St. Joseph HSS*
6. C.Lalhruaitluanga - a pa C. Zaihmingthanga
*St. Paul's HSS*
7. Zomuansanga - a pa Francis Zothanmawia
*Goodwill English Academy, Serchhip*
8. Malsawmkima - a pa Lalbeiseia
*St. Paul's HSS*
9. Vanlalhruaii - a pa H. Lalbiaksanga
*Mount Carmel School*
9. Lallawmsangi - a pa Lalsangliana
*St. Joseph HSS*
10. Hmangaihtharzeli - a pa MS Dawngliana
*Greenland HSS*
10. Priscilla Lalmawikimi - a pa Issac Vanlalhruaia
*St. James School*
10. Vanlalhruaizeli - a pa Hmingthantluanga
K.D High School
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: