Mizoram Football Association (MFA) khawmpui lian neih a ni

Mizoram Football Association (MFA) chuan vawiin May ni 23, 2024 hian Aijal Club ah General Body Meeting a buatsaih a; District 11 atanga District Football Association tin aiawh kalkhawmte chuan kum 2023-2024 season kal mek a hmalakna hrang hrang thlir kirin, season thar lo awm tura hmalakna tur te an thlirho bawk. Chawhnu lamah MFA term thara hruaitu tur an thlang thar bawk.

MFA President kal chhuak tur Pu Lal Thanzara chuan President a nih chhunga kum bithliah hrang hranga Mizoram football hlawhtlinna te tarlangin, Senior inelna Santosh Trophy, I-League leh National Games football a Mizoram in hlawhtlinna a chang te, Senior Men’s National Team a Mizo tlangval thahnem tak thawh thei dinhmuna kan ding chho ve te leh Reliance Foundation nena thawk dun a naupang inelna mumal taka kalpui a ni te chu lawmawm a tih thu a sawi.

Pu Lal Thanzara chuan Mizo tlangvalten football avanga sum tam tak an hlawh chhuah thu leh MFA hruaitu zinga All India Football Federation (AIFF) a nihna sang tak an chelh chho ta te chu lawmawm a tih thu a sawi a; heng hlawhtlinna hrang hrang hi District FA tin leh Zone tina football tana mi inpe tak takte thawhrah a ni tih a sawi. 

MFA Honorary Secretary Pu Lalnghinglova Hmar chuan tun season liam tura MFA thil tawn hrang hrang a sawi lang a. Sub-Junior National ah kan champion thu tarlangin, Senior inelna Santosh Trophy leh National under 20 a semi finals kan thlen thu te, Junior ah erawh kan mualpho thu a sawi.

Pu Lalnghinglova Hmar chuan Reliance Foundation nena thawhhona tha tak MFA in a nei chu lawmawm a tih thu a sawi a. Aizawl bakah Lunglei, Champhai leh Kolasib ah te naupang league kalpui a ni a, naupangten season khatah match 30 chuang an khel te chuan rah tha a chhuah ngei dawna a lan thu sawiin, “Football khelh thiam bak hmabak an nei lo,” a ti a ni.

Pu Lalnghinglova Hmar, Sports Minister ni bawk chuan President kal chhuak tur Pu Lal Thanzara chu mi hawihhawm leh thawhpui nuam a nih thu sawiin, MFA ah politics a lalut ngai lo, a ti a. Kum 13 president a nih chhungin Mizoram football in India rama state hrang hrang inelna chitinah a ber nihna kan chang a, Pu Lal Thanzara hian hmingthat lak a tum ngai lova, a inkiltawih zawk thin a ni tiin, Mizoram Football in a kalchhuak tur chu an ui takzet thu a sawi a ni.

MFA Annual General Body Meeting ah hian District FA hrang hrang atanga rawtna (agenda) rawn lut te leh MFA in rawtna a chhawpchhuah te ngaihtuah ho a ni.

Chawhnu lamah MFA term thar, kum 2024-2028 chhunga hruaitu tur thlan thar an ni a.

President – Lalnghinglova Hmar

Sr. Vice President – PC Vanlalhruaia

Vice President – Lalruatsanga Tochhawng

Honorary Secretary – Lalrengpuia

Joint Secretary – Lalrawngbawla

Treasurer – C. Vanlalmawia

Finance Secretary – LV Lalthantluanga