MPSC Chairman atan R Lalramnghaka'n rinawmna thu tiam

Aizawl | May 20, 2024: Governor Dr Hari Babu Kambhampati chuan Pu R.Lalramnghaka, IAS (Rtd) chu vawiin chawhma khan Durbar Hall, Raj Bhavan, Aizawl-ah rinawmna thu tiam tirin Mizoram Public Service Commission (MPSC) Chairman thar atan a lalut.

Swearing in Ceremony program-ah hian Dr Renu Sharma, Chief Secretary chuan Warrant of Appointment a chhiar hmasa a. Hemi hnu hian Governor Dr Hari Babu Kambhampati chuan R.Lalramnghaka, IAS (Rtd) chu rinawmna thutiam (Oath of Office, Allegiance and Secrecy) chham tirin MPSC Chairman ni atan a lalut a ni.

MPSC Chairman lakluhna Inkhawmah hian Chief Minister Pu Lalduhoma a tel a. He hunah hian Speaker Pu Lalbiakzama, Home Minister Pu K.Sapdanga, Cabinet Minister te, Minister te, MLA te leh mi pawimawh dangte an tel tha hle a, Pu Zoramthanga, Chief Minister hlui pawh a rawn tel thei a ni.

Thiamna lamah Pu R.Lalramnghaka hian B.Sc (Agri) degree a nei a. Kum 1991 khan Mizoram Civil Service a zawm a, chumi hnuah kum 2009 khan Indian Administrative Service (IAS), AGMUT Cadre-ah hlankai a ni leh bawk a ni.

Pu R. Lalramnghaka hian Mizoram sorkar hnuaiah mawhphurhna pawimawh tak tak a chelh tawh thin a. Director, SIRD, D.C. Kolasib, Jt.Secy, LR&S/LAD, Director, LR&S, Director, FCS&CA& Addl. Secretary, LR&S, Secretary, LR&S/LAD, DC, Aizawl, Secretary, Health & Family Welfare Department, Commerce & Industries Department, leh Department of Personnel & Administrative Reforms te a ni tawh a. MPSC Chairman atana ruat a nih hma chiah hian Secretary, General Administration Department &Public Works Department a ni bawk. Pu.R.Lalramnghaka hi sawrkar hna thawk tha, hna thiam tak, mahni hna atana inpe mi leh entawn tlak nia sawi a ni.

Pu.R.Lalramnghaka hi 09.09.1965 khan a piang a. A nu leh pa te chu Pu Kapdaia (L) leh Saikungi (L) te an ni a. A nupui Pi Vanlalliani leh a fate nen Aizawl Electric vengah an cheng mek a ni.