Aizawl | May 20, 2024: Mizoram Home Secretary hlui Lalbiakzama, MPS (Retd) ziah, 'Kat leh Daifim' Movie chu May 31, 2024 hian tihchhuah a ni dawn.
He film-ah hian, Mizo filma hmelhriat hlawh tawh Hlui Sailo leh Mary Kimkimi an inlan dawn a, Lianpuia, Rohlua Sailo, Maawma Ngente, Rinmawia, Apa Khenga, leh LBa te an inlan dawn a ni.
MBT and Jeremy Visual Production presents 'Kat leh Daifim' Lalbiakzama (Bza) ziah leh Direct a ni a, Jeremy Lalngilneia chu Director of Photography a ni a, Producer hi Benjamin Lalhmingliana a ni. Sound editor hi PB Mama niin, Production Assistant hi Angela a ni a, Makeup artist hi Ashie a ni, Score hi Tluanga Wowiee niin, Production Crew -ah hian MSKA Lee Lawma te an ni.
A thawnthu chu:
Fahrah unau pahnih hi rethei takin a pu hovin an khawsa a, a u zawk chu Zama niin a nau zawk chu Mawia a ni. Chutianga an khawsak mek lai chuan anmahni enkawltu, an pu chuan a thihsan leh ta thut mai a, Zama te unau chu tleirawl mai an la ni. A u chuan Mawia chu fa ang maiin a enkawl zui a, eizawnna ngelnghet zawk siamsak tumin a rem rem a thawk a, inhlawh ve pawh phal lovin lehkha a zirtir thin.
Mawia pawh chu zirna lamah a tluang chho hle a, a thawhrah ngeia hna hmuh tumin theihtawp a chhuah ve reng a, chutih mek lai chuan Zama chuan thawhpui thar a chhar a, mihausa leh thil tithei tak a ni. Zama chuan a thawhpuipa chu a nau hna zawnpui turin a ngen a, a thawhpuipa chu Sorkar hotute lamah pawh alo tlatlum ngang mai. Kar lovah Mawia chu Police-ah an thun a, a ute ruahmanna erawh Mawia chuan a hre ve reng reng lo thung.
Zama te sumdawnna chuan thuneitute mit a tikham tan a, Mawia erawh dik taka hnathawh duh mi a ni. An unau chuan nun kawng chhuk chho harsa takin paltlang dun mah se, hmalam beisei dan inpersan tak avangin an hmathlir a dang chho telh telh a, an kawng zawh inang lo tak avang chuan an dinhmun a inep lo thei si lo. Harsatna atanga amah leh a a nau khaichhuak tura a u beihna chuan chhia leh tha thliar hlei thei loin a siam a, hmangaihna dawngtu, a nau chuan kut kawl nen alo hmuah a ngai dawn em ni?
A siamtu lam:
He film hi Pu Lalbiakzama ziah niin ama'n a Direct nghal a ni. Pu Bza hi film siam lama tui tak a ni a, kum 1980's vel atang khan lo tuipui tawhin, film puitling siam tumin hma pawh alo la tawh thin a, mahse, shooting an neih laiin eizawnna avangin a chhunzawm theih lo a, a eizawnna atanga a pension hlim atangin film siam lamah a bur leh nghal chat a ni. Hmun hrang hrangah Police Officer niin a awm kual a, a hna atanga a tawnhriat chi hrang hrang lakhawmin thawnthu tha tak tak a ziak a, he movie pawh hi thil thleng tak tak behchhana siam 'Inspired by true events' kan tih ang chi kha a ni.
Jeremy Lalngilneia nen a tir phat atangin an thawk dun a, ani hi thla latu (Director of Photography) niin a video hi a edit nghal bawk a ni. Christian film Mizovin kan neih that zinga thawhhlawk tak niin Dinthar Kohhran leh KTP film siam Nun Krista (2011) leh Lal Isua Nen (2013) tiha a thla latu kha a ni a, kum 2022 kumtawpa release 'The Lottery' ah khan Director hna a lo chelh tawh bawk a ni.
Film lo pianchhuah dan:
Kum 2023 April thla khan a changtute an zawng tan a, an inhmuhkim hnuah thla khat aia tam mah film script zirpuina (conditioning) neiin hun an hmang a. Kum 2023 vek, June thla tawp atangin shooting an tan a ni. Mi dangin thla 3 - 4 vela an zawhfel laiin anni hi chuan kum 1 chuang buaipuiin siamthat ngai laite an siam tha chho mawlh mawlh a, May 31, 2024 zan hian tlangzarh a ni dawn ta. He Movie hi Zonet Empai App-ah lei theihin dah a ni dawn a ni.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: