'Keimah Thingtlang Nula' film mipuiin an hlut; Lersia play atangin mi 5.4k chuangin lei tawh!

Aizawl | May 7, 2024: OSIAMA PICTURES PRODUCTION chuan YouTube lam a thawnthu lar tak leh Mizo mipui ten a, an ngaihzawn rawn ‘Keimah thingtlang nula’ Angel Pops ziah chu, film puitlinga chhawp chhuakin May 3 zan khan Vanapa hall-ah tlangzarh a ni a, mipuiin an hlut a, hralh a kal chur chur hle.

‘Keimah thingtlang nula’ film Director of Photography Osiama hnena atanga Explore Mizoram thu dawn danin, he thu buatsaih lai thleng hian mi 5400 chuangin film hi an lei tawh a, sum lut pawh Nuai 12 a chuang tawh a ni!

He film siam nan hian nuai 12 vel sen ral anga chhut a ni a, he film siamtute dinhmun tur erawh a la chiang lo a ni.

Lersia atanga leitu bakah hian tlangzarh zan hian ticket 430 vel hralh chhuah a ni a. Mipuiin an hlut hle a ni.

Naktuk lamah hian he film hi Youtube lamah tlem a zawng dah chhuah tum niin Osiama chuan Explore Mizoram a hrilh bawk.

Mizo mipui hlut leh ngaihven hlawh ‘Keimah thingtlang nula’ Film hi Lersia Play-ah a duh apiang en theih turin chhawp chhuah a ni.

He movie ah hian Comedy, Romance leh Suspense Thriller te kan hmu a. Thingtlang khaw pakhat a thil thleng hlimawm leh lungchhiatthlak tak kar a thian in hmangaihna leh duhamna inbuk tawnna thil a ni.

He Film hi ‘Royte Business’ produce niin, Director hi J.S.Tharmawia ‘Kherawlai’ film lo direct tawh tu kha a ni a, Director of Photography (DOP) atan Production hming chawitu C Lalliansiama (Osiama Pictures) a ni. Mizoram Film Industry a sulhnu lo nei nual tawh niin, ‘Kherawlai’, ‘Ramri’ leh ‘Friends from mini hotel’ ah te DOP a lo ni tawh a ni. He Film a changtute zingah hian Mizo ten a kan hmelhriat sa leh Film lam a sulhnu lo nei nual tawh te an tel nuk dawn.

A changtute:

Sangteii Renza: A hming kan hriat rual a kan mitthla thin ‘Nunna Thar’ film a hnehsawh tak a changtunu role lo play tawh tu kha a ni a, a lanna tawh phawt hi chu kan hmaih phal awm lo ve. ‘Keimah Thingtlang Nula’ filmah pawh hian role pawimawh tak a chang dawn a ni.

Vanlalduhawma: ‘Kawrthindenga’ ti a kan hriat lar tak ngei mai kha, he film ah hian role pawimawh tak mai la tur a ni a. Zai chauh ni lo lemchan khawvel a sulhnu lo nei nual tawh niin, ‘Kherawlai’ leh ‘Ambush’ film ah te pawh a lo in lan tawh a ni.

Vanlallawmawmi (Vli): Mizo film ngaina te tan chuan a hming hi a mikhual lo hle tih kan hre theuhin a rinawm, ‘Mimi’ leh ‘Friends from mini hotel’ ah te khan main role la in, Mi tin mit a ti tlei hle a nih kha.

Lalmuanpuia (Mpa): Supporting actor ni chung a, hming chher chho mek Mizo film lam a sulhnu tha tak nei a ni a, ‘Kherawlai’ ‘Mimi’ leh ‘Ambush’ ah te a lo in lan tawh a ni.

Tetea: Mizoram-in a Country Singer kan neih that zinga mi niin, ‘Keimah Thingtlang Nula’ Filmah hian main role a la dawn a ni.

Rosy Lalramthlengi: Chhelo, Hmeltha leh zei ti a a mah hre tu ten an fak thin, ‘Apate’ tih filmah khan a role hnehsawh takin a lo play tawh a. ‘Keimah Thingtlang Nula’ ah pawh hian main role la in, mi te mit fuk na ber tur a ni leh ngei ang.

Msi Hmar: Aibawk nula Zai thiam leh hmeltha tak niin, Acting lam tui mi niin a duai lo hle.

Heng bakah hian a changtu lamah hian, he film an siamna khua East Lungdar khua atangin inlan an awm nual a, a khua in an neih that ber ber te an in lan bawk a ni.

He film buatsaih nan hian a thawntu ruangam buatsaih atanga a chan chhuah leh tlangzarh thlengin tha leh zung, sum leh pai an seng ral hnem a, East Lungdar-ah hun rei tak inkulhin an chang a. An chan zawh hnu-ah buaina dang awm lehin, an duh hun leh ruahman hunah pawh tlangzarh thei lovin an awm nghe nghe a ni.